കായികലോകത്തെ ഏറ്റവും വലിയ മാമാങ്കമായ 2036-ലെ ഒളിമ്പിക്സിന് ആതിഥേയത്വം വഹിക്കാനുള്ള ഇന്ത്യയുടെ സ്വപ്നങ്ങൾക്ക് ചിറകുമുളപ്പിക്കുന്നു. ഒളിമ്പിക്‌സ് വേദിക്കായി ഇന്ത്യ നൽകിയ അപേക്ഷ അടുത്ത ഘട്ടത്തിലേക്ക് കടന്നതായും ഇതിനായി ആകെ ഏഴ് രാജ്യങ്ങളാണ് ഔദ്യോഗികമായി രംഗത്തുള്ളതെന്നും അന്താരാഷ്ട്ര ഒളിമ്പിക് കമ്മിറ്റി (IOC) സ്ഥിരീകരിച്ചു. ഇന്ത്യയ്‌ക്ക് പുറമെ ജർമനി, ഹംഗറി, ഖത്തർ, ദക്ഷിണ കൊറിയ, ദക്ഷിണാഫ്രിക്ക, തുർക്കി എന്നീ വൻശക്തികളാണ് ആതിഥേയത്വത്തിനായുള്ള കടുത്ത മത്സരരംഗത്തുള്ളത്.
താത്പര്യം അറിയിക്കാനുള്ള നിശ്ചിത സമയപരിധി അവസാനിച്ചതോടെയാണ് വ്യാപ്തി വ്യക്തമാക്കിക്കൊണ്ട് ഐ.ഒ.സി പുതിയ പട്ടിക പുറത്തുവിട്ടത്. ഒളിമ്പിക്സിന് വേദിയാകാൻ ഇന്ത്യയിൽ നിന്ന് ഗുജറാത്തിലെ അഹമ്മദാബാദ് നഗരത്തെയാണ് പ്രധാനമായും പരിഗണിക്കുന്നത്. അടുത്ത ഘട്ടത്തിൽ നവംബർ മാസത്തോടെ വിവിധ ദേശീയ ഒളിമ്പിക് കമ്മിറ്റികളുടെ തത്സമയ പ്രസന്റേഷനുകൾ ഐ.ഒ.സിയുടെ ഫ്യൂച്ചർ ഹോസ്റ്റ് കമ്മീഷൻ മുൻപാകെ നടക്കും. തുടർന്ന് 2028 വരെയുള്ള ‘സ്ട്രറ്റീജിക് ഡയലോഗ്’ ഘട്ടത്തിന് ശേഷമായിരിക്കും ആതിഥേയരെക്കുറിച്ചുള്ള അന്തിമ തീരുമാനത്തിലേക്ക് നീങ്ങുക.
ഏഷ്യയിൽ നിന്ന് ഖത്തറും ദക്ഷിണ കൊറിയയും ഇന്ത്യക്ക് വൻ വെല്ലുവിളി ഉയർത്തുമ്പോൾ, ഒളിമ്പിക്സിന് ഇതുവരെ വേദിയാകാത്ത ആഫ്രിക്കൻ ഭൂഖണ്ഡത്തിൽ നിന്ന് ദക്ഷിണാഫ്രിക്ക രംഗത്തുള്ളതും യൂറോപ്പിൽ നിന്നും ജർമനിയും ഹംഗറിയും രംഗത്തുള്ളതും പോരാട്ടം തീപ്പാറുന്നതാക്കും. എന്നിരുന്നാലും ശക്തമായ കായിക അടിസ്ഥാന സൗകര്യങ്ങളും ആഗോള വേദികളിലെ മികവും മുൻനിർത്തി 2036-ൽ കായികമാമാങ്കം ഇന്ത്യയിലേക്ക് എത്തിക്കാൻ കഴിയുമെന്ന ആത്മവിശ്വാസത്തിലാണ് ഇന്ത്യൻ ഒളിമ്പിക് അസോസിയേഷനും കേന്ദ്ര കായിക മന്ത്രാലയവും. 2029 പകുതിയോടെ ഐ.ഒ.സി എക്സിക്യൂട്ടീവ് ബോർഡ് വിജയികളെ ഔദ്യോഗികമായി തിരഞ്ഞെടുക്കുമെന്നാണ് പ്രതീക്ഷിക്കുന്നത്.
