ഡൽഹി: പൗരത്വ ഭേദഗതി നിയമവുമായി ബന്ധപ്പെട്ട് ഡൽഹിയിൽ കലാപം നടന്നപ്പോൾ കലാപകാരികൾക്ക് ആയുധം വിതരണം ചെയ്ത ആയുധ വ്യാപാരി അറസ്റ്റിൽ. 34 വയസ്സുകാരനായ ബാബു വസീമിനെയാണ് ഡൽഹി പൊലീസ് അറസ്റ്റ് ചെയ്തത്. ഡൽഹി പൊലീസിന് നേരെ തോക്ക് ചൂണ്ടിയ ഷാരൂഖ് പത്താൻ എന്ന കലാപകാരിയുടെ ചിത്രം സാമൂഹിക മാധ്യമങ്ങളിൽ വൈറൽ ആയിരുന്നു. ഇയാൾക്ക് ആയുധം നൽകിയതും വസീമാണ്.
ഉത്തർ പ്രദേശിലെ മീററ്റ് സ്വദേശിയാണ് ബാബു വസീം. താഹിർപൂരിൽ നിന്നാണ് ഇയാൾ അറസ്റ്റിലായത്. ഇയാളിൽ നിന്നും തോക്കുകളും തിരകളും കണ്ടെടുത്തിട്ടുണ്ട്.
ഉത്തർ പ്രദേശിലെ ഇസ്ലാമിക മൗലികവാദികൾക്കും ആയുധങ്ങൾ വിതരണം ചെയ്തിരുന്നതായി ചോദ്യം ചെയ്യലിൽ ഇയാൾ സമ്മതിച്ചു. ഡൽഹി കലാപകാലത്ത് 250ൽ അധികം ആയുധങ്ങൾ ഇയാൾ വിതരണം ചെയ്തതായാണ് വ്യക്തമായിരിക്കുന്നത്. കൊട്ടേഷൻ കൊലപാതകങ്ങൾ, വെടിവെപ്പുകൾ, കൊലപാതക ശ്രമങ്ങൾ എന്നിവയ്ക്ക് ഉത്തർ പ്രദേശിലും ഡൽഹിയിലും ബാബു വസീമിനെതിരെ നിരവധി കേസുകൾ നിലവിലുണ്ട്.
