ദോഹ: ലയണല്‍ മെസിയെ കുറിച്ച് മനസ് തുറന്ന് അര്‍ജന്റീനയുടെ മുന്‍ ഇതിഹാസ താരം ഗബ്രിയേല്‍ ബാറ്റിസ്റ്റിയൂട്ട. ഈ ലോകകപ്പില്‍ 35കാരനായ മെസി അല്‍പ്പം ശാന്തനാകുമെന്നാണ് പ്രതീക്ഷിച്ചത്, എന്നാല്‍ 20കാരനെ പോലെയാണ് മെസിയുടെ കളിയെന്നും ബാറ്റിസ്റ്റ്യൂട്ട വ്യക്തമാക്കി.
അര്‍ജന്റീന കണ്ട എക്കാലത്തെയും ഇതിഹാസ താരങ്ങളില്‍ ഒരാളാണ് ബാറ്റിസ്റ്റ്യൂട്ട. മെസിയുടെ കളി വളരെ ഇഷ്ടമാണെന്നു പറഞ്ഞ അദ്ദേഹം തന്റെ റെക്കോര്‍ഡുകള്‍ ഓരോന്നായി മെസി മറികടക്കുന്നത് ഒട്ടും വേദനിപ്പിച്ചിട്ടില്ലെന്നും എല്ലാം തന്നെ സന്തോഷിപ്പിക്കുന്നതായും പറഞ്ഞു. ’20കാരനെ പോലെയാണ് അവന്റെ കളി, ആ ആവേശം കപ്പ് ഉയര്‍ത്താന്‍ സഹായിക്കും’ 53 കാരനായ ബാറ്റിസ്റ്റ്യൂട്ട ചൂണ്ടിക്കാട്ടി. ലോകകപ്പില്‍ അര്‍ജന്റീനയ്ക്കുവേണ്ടി ഏറ്റവും കൂടുതല്‍ ഗോളുകള്‍ നേടുന്നയാള്‍ എന്ന പദവിക്ക് മെസി അര്‍ഹനാണ്. അങ്ങനെയൊരാള്‍ ഉണ്ടെങ്കില്‍ അത് മെസി ആയിരിക്കുമെന്നും താരം പറഞ്ഞു.
” മെസി അന്യഗ്രഹ ജീവിയൊന്നുമല്ല, മറ്റെല്ലാവരേക്കാളും നന്നായി ഫുട്‌ബോള്‍ കളിക്കുന്ന ഒരു സാധാരണ മനുഷ്യന്‍. അര്‍ജന്റീനയ്ക്ക് കപ്പ് നേടാനാകുന്ന ഒരു പോസിറ്റിവ് എനര്‍ജി ഇപ്പോഴിവിടെയുണ്ട്” ബാറ്റിസ്റ്റിയൂട്ട വ്യക്തമാക്കി.
Discussion about this post