തിരുവനന്തപുരം: കേരളത്തിലെ സിനിമാ- ക്രിക്കറ്റ് ആരാധകരെ കടുത്ത ആശങ്കയിലാക്കി കേരള ക്രിക്കറ്റ് അസോസിയേഷൻ ജോയിന്റ് സെക്രട്ടറി ബിനീഷ് കോടിയേരിയുടെ പ്രഖ്യാപനം. ചലച്ചിത്ര താരങ്ങളുടെ ക്രിക്കറ്റ് ലീഗായ സെലിബ്രിറ്റി ക്രിക്കറ്റ് ലീഗിൽ ഇക്കുറി കേരള സ്ട്രൈക്കേഴ്സിനായി താൻ കളിക്കില്ലെന്ന് ബിനീഷ് അറിയിച്ചു. കേരള ക്രിക്കറ്റ് അസോസിയേഷൻ ഭാരവാഹിയായതിനാലാണ് താൻ സിസിഎല്ലിൽ കളിക്കാത്തതെന്നാണ് ബിനീഷ് അറിയിച്ചിരിക്കുന്നത്.
ഫെബ്രുവരി 18 മുതൽ മാർച്ച് 19 വരെയാണ് സിസിഎല്ലിന്റെ ഒൻപതാം സീസൺ. മോഹൻലാലാണ് കേരള സ്ട്രൈക്കേഴ്സിന്റെ നോൺ പ്ലേയിംഗ് ക്യാപ്ടൻ. കുഞ്ചാക്കോ ബോബനാണ് പ്ലേയിംഗ് ക്യാപ്ടൻ.
കഴിഞ്ഞ സീസണുകളിൽ കേരള സ്ട്രൈക്കേഴ്സിനായി ഏറെക്കുറെ എല്ലാ മത്സരങ്ങളിലും ബിനീഷ് കളിച്ചിരുന്നു. ഇത്തവണ താൻ കളത്തിലുണ്ടാകില്ലെന്ന് ഓൺലൈൻ മാദ്ധ്യമത്തിന് അനുവദിച്ച അഭിമുഖത്തിലാണ് ബിനീഷ് വ്യക്തമാക്കിയിരിക്കുന്നത്. ബിനീഷിന്റെ അസാന്നിദ്ധ്യം കേരള സ്ട്രൈക്കേഴ്സിന് തീരാനഷ്ടമായിരിക്കും എന്നാണ് ഒരു വിഭാഗം സിനിമാ- ക്രിക്കറ്റ് ആരാധകരുടെ നിരീക്ഷണം.
കേരള സ്ട്രൈക്കേഴ്സ് ടീം: മോഹൻലാൽ (നോൺ പ്ലേയിംഗ് ക്യാപ്ടൻ), കുഞ്ചാക്കോ ബോബൻ (പ്ലേയിംഗ് ക്യാപ്ടൻ), ആസിഫ് അലി, രാജീവ് പിള്ള, ഉണ്ണി മുകുന്ദൻ, അർജുൻ നന്ദകുമാർ, ഇന്ദ്രജിത്ത്, മണിക്കുട്ടൻ, വിജയ് യേശുദാസ്, ഷഫീഖ്, വിവേക് ഗോപൻ, സൈജു കുറുപ്പ്, വിനു മോഹൻ, നിഖിൽ കെ മേനോൻ, പ്രജോദ്, ആന്റണി പെപ്പെ, സഞ്ജു ശിവറാം, സിജു വിൽസൺ, പ്രശാന്ത്, ജീൻ പോൾ ലാൽ, സിദ്ധാർത്ഥ്
