തൃശ്ശൂർ: വരവൂരിൽ കതിന പൊട്ടിത്തെറിച്ച് അപകടം. നാല് പേർക്ക് പരിക്കേറ്റു. വരവൂർ സ്വദേശികളായ ശ്യാംജിത്ത്, ശ്യാംലാൽ, രാജേഷ്, ശബരി എന്നിവർക്കാണ് പരിക്കേറ്റത്. ഇവരെ ആശുപത്രിയിൽ പ്രവേശിപ്പിച്ചു.
ഉച്ചയ്ക്ക് ഒരു മണിയോടെയായിരുന്നു സംഭവം. പ്രദേശത്തെ ക്ഷേത്രത്തിൽ ഉത്സവമാണ്. ഇതിനോട് അനുബന്ധിച്ച് കതിന നിറയ്ക്കുന്നതിനിടെ പൊട്ടിത്തെറിക്കുകയായിരുന്നു. ഉടൻ തന്നെ പ്രദേശവാസികൾ ഇവരെ മെഡിക്കൽ കോളേജ് ആശുപത്രിയിൽ എത്തിച്ചു.
പരിക്കേറ്റവരിൽ രണ്ട് പേരുടെ നില അതീവ ഗുരുതരമാണ്. ഇവർക്ക് 70 ശതമാനത്തിന് മുകളിൽ പൊള്ളലേറ്റിട്ടുണ്ട്. നാല് പേരും ബേൺ ഐസിയുവിൽ ചികിത്സയിലാണ്. അതേസമയം എങ്ങനെയാണ് കതിന പൊട്ടിത്തെറിച്ചത് എന്ന് വ്യക്തമല്ല. സംഭവത്തിൽ അന്വേഷണം ആരംഭിച്ചു.
