ന്യൂഡൽഹി: അന്താരാഷ്ട്ര സർവ്വീസ് നടത്തുന്ന വിമാനത്തിന്റെ ടോയ്‌ലറ്റിൽ നിന്നും കണ്ടെടുത്തത് 1.95 കോടിയിലധികം രൂപ വിലവരുന്ന സ്വർണം. നാല് ബാറുകളായി സൂക്ഷിച്ചിരുന്ന സ്വർണമാണ് കസ്റ്റംസ് പിടിച്ചെടുത്തത്. രഹസ്യ വിവരത്തിന്റെ അടിസ്ഥാനത്തിൽ നടത്തിയ പരിശോധനയിലാണ് സ്വർണം പിടിച്ചത്.
സർവ്വീസിന് ശേഷം ഡൽഹി വിമാനത്താവളത്തിലെ ടെർമിനൽ 2 ൽ എത്തിയ വിമാനത്തിൽ നിന്നാണ് സ്വർണം പിടിച്ചത്. നാല് സ്വർണ ബാറുകളായിരുന്നു ഉണ്ടായിരുന്നത്. ചാര നിറത്തിലുളള പൗച്ചിൽ സൂക്ഷിച്ച നിലയിലായിരുന്നു സ്വർണ ബാറുകൾ. 3969 ഗ്രാം വരുന്ന സ്വർണമാണ് കണ്ടെടുത്തതെന്ന് കസ്റ്റംസ് പറഞ്ഞു.
സംഭവത്തിൽ കൂടുതൽ അന്വേഷണം നടത്തുമെന്നും കസ്റ്റംസ് അറിയിച്ചു. വിമാനത്തിനുള്ളിൽ ആരാണ് സ്വർണം വെച്ചതെന്ന് കൃത്യമായ വിവരമില്ല. പിടിക്കപ്പെടുമെന്ന് ആയപ്പോൾ ഉപേക്ഷിച്ചതാണോയെന്നും സംശയിക്കുന്നുണ്ട്. കഴിഞ്ഞ മാസം അവസാനം ചെന്നൈ വിമാനത്താവളത്തിൽ സ്വർണം കടത്താൻ ശ്രമിച്ചതിന് ഒരു ഗ്രൗണ്ട് സ്റ്റാഫിനെ കസ്റ്റംസ് പിടികൂടിയിരുന്നു.
