കോട്ടയം: ‘വൈക്കം കടപ്പുറത്ത് ‘ സിപിഎം സംഘടിപ്പിക്കുന്ന ചടങ്ങിലേക്ക് ജനങ്ങളെ ക്ഷണിച്ച് വിദ്യാഭ്യാസമന്ത്രി വി ശിവൻകുട്ടി. മുഖ്യമന്ത്രി പിണറായി വിജയനും തമിഴ്‌നാട് മുഖ്യമന്ത്രി എംകെ സ്റ്റാലിനും ഏപ്രിൽ 1 ന് പങ്കെടുക്കുന്ന പരിപാടിയിലേക്ക് വൈക്കം കടപ്പുറത്തേക്കാണ് ക്ഷണം. മന്ത്രി ഫേസ്ബുക്കിൽ പങ്കുവച്ച വീഡിയോയിലാണ് ഈ വലിയ അബദ്ധം സംഭവിച്ചിരിക്കുന്നത്.
കായൽ മാത്രമുള്ള വൈക്കത്ത് കടൽ എവിടെയെന്ന് മന്ത്രിയുടെ പോസ്റ്റിന് താഴെ നിരവധി പേർ ചോദിച്ചു.കടൽ ഇല്ലാത്ത ഞങ്ങൾ ഇടുക്കിക്കാർക്കും വയനാട്ടുകാർക്കും കടൽ അനുവദിച്ച് തരണമേയെന്ന് നിരവധി പേരാണ് മന്ത്രിയുടെ പോസ്റ്റിന് താഴെ കമന്റിട്ടത്. അബദ്ധം മനസിലാതെ തിരുത്താൻ ഉള്ള ശ്രമം പോലും നടത്താതെ വിദ്യാഭ്യാസ മന്ത്രി പോസ്റ്റ് ഡിലീറ്റ് ചെയ്ത് ചോദ്യങ്ങളിൽ നിന്ന് രക്ഷപ്പെടുകയായിരുന്നു.
ചരിത്ര സംഭവങ്ങൾ ഒട്ടേറെ നടന്ന, ഗാന്ധിജി വരെ സന്ദർശിച്ച കോട്ടയം ജില്ലയിലെ വൈക്കത്ത് കടൽ ഇല്ലെന്ന കാര്യം ചെറിയ ക്ലാസിലെ കുട്ടികൾക്ക് വരെ അറിയാമെന്നിരിക്കെയാണ് പാർട്ടിയ്ക്കും മന്ത്രിയ്ക്കും ഇത്രയും വലിയ അബദ്ധം പിണഞ്ഞത്.
