ഇൻഫോസിസ് സഹ സ്ഥാപകൻ നാരായൺ മൂർത്തിയുടെ ഭാര്യയും എഴുത്തുകാരിയുമാണ് സുധാ മൂർത്തി. താനൊരു പ്രത്യേക പ്രശ്നം അനുഭവിക്കുന്നുണ്ടെന്ന് വെളിപ്പെടുത്തിയിരിക്കുകയാണ് അവർ. താൻ ബ്രിട്ടീഷ് പ്രധാനമന്ത്രി ഋഷി സുനകിന്റെ ഭാര്യയുടെ അമ്മയാണെന്നും ഇത് ആരും വിശ്വസിക്കുന്നില്ലെന്നുമാണ് അവർ പറയുന്നത്. നാരായൺ മൂർത്തിയുടേയും സുധാ മൂർത്തിയുടേയും മകളായ അക്ഷതയാണ് ഋഷി സുനകിന്റെ ഭാര്യ.
ഹിന്ദി ടിവി ചാനലിലെ പ്രശസ്ത പരിപാടി ആയ കപിൽ ശർമ ഷോയിലാണ് സുധാ മൂർത്തി ഇക്കാര്യം വ്യക്തമാക്കിയത്. കൂടാതെ ഇതോടനുബന്ധിച്ച് അവർക്കുണ്ടായ രസകരമായ അനുഭവവും പരിപാടിയിൽ പങ്കുവെച്ചു. ഒരിക്കൽ ബ്രിട്ടനിലേക്ക് പോകുമ്പോൾ അവിടെവച്ച് തന്റെ അഡ്രസ് ചോദിച്ചുവെന്നും ബ്രിട്ടനിൽ തന്നെയുള്ള മകന്റെ അഡ്രസ് ഓർമ്മയില്ലാത്തിനാൽ 10 ഡൗണിംഗ് സ്ട്രീറ്റ് എന്ന അഡ്രസാണ് നൽകിയതെന്നും അവർ പറഞ്ഞു. ബ്രിട്ടീഷ് പ്രധാനമന്ത്രിയുടെ ഔദ്യോഗിക വസതിയുടെ അഡ്രസാണിത്. എന്നാൽ അഡ്രസ് കണ്ട ഇമിഗ്രേഷൻ ഓഫീസർ വിശ്വസിച്ചില്ല. തമാശ പറയുകയാണെന്ന് കരുതി. 72 വയസുള്ള ഇത്രയും ലാളിത്യമുള്ള ഒരു സ്ത്രീ ഒരിക്കലും പ്രധാനമന്ത്രിയുടെ ഭാര്യയുടെ അമ്മ ആയിരിക്കുമെന്ന് ആരും വിശ്വസിക്കില്ലെന്ന് സുധാ മൂർത്തി പറഞ്ഞു.
കപിൽ ഷോയിൽ സുധാ മൂർത്തിയോടൊപ്പം ഓസ്കാർ ജേതാവായ പ്രൊഡ്യൂസർ ഗുനീത് മോങ്കയും നടിയും പത്മശ്രീ ജേതാവുമായ രവീണ ടണ്ഡനും പങ്കെടുത്തു. ഏപ്രിലിൽ സുധാ മൂർത്തിയെ പത്മഭൂഷൺ നൽകി രാജ്യം ആദരിച്ചിരുന്നു.
