ദി കേരള സ്റ്റോറി താരം ആദ ശർമ്മയുടെ ഫോൺ നമ്പർ ചോർന്നതായി പരാതി. ഒരു ഇൻസ്റ്റഗ്രാം പേജാണ് താരത്തിന്റെ നമ്പർ പുറത്ത് വിട്ടതെന്നാണ് വിവരം. ഫോണിലേക്ക് ഒരു ദിവസം ആയിരക്കണക്കിന് സന്ദേശങ്ങളും കോളുകളും വന്നതോടെയാണ് സംഭവത്തിന്റെ ഗൗരവം തനിക്ക് ബോദ്ധ്യപ്പെട്ടതെന്ന് ആദ ശർമ്മ പറയുന്നു. ലഭിച്ചവയിൽ പലതും ഭീഷണി സന്ദേശങ്ങളായിരുന്നു.
‘നമ്പർ ചോർത്തിയ ആളുടെ വികൃതമായ മാനസികാവസ്ഥയാണ് ഇവിടെ വെളിപ്പെടുന്നത്. ദ കേരള സ്റ്റോറിയിലെ സമാനമായ ഒരു രംഗമാണ് ഇപ്പോൾ ഓർമ്മ വരുന്നത്. അതിൽ ഒരു പെൺകുട്ടിയുടെ നമ്പർ പുറത്ത് വിട്ട് അവളെ ഉപദ്രവിക്കുന്ന ഒരു രംഗമുണ്ട്. താനിപ്പോൾ ഫോൺ നമ്പർ മാറ്റാനുള്ള ശ്രമം നടത്തിക്കൊണ്ടിരിക്കുകയാണെന്നും’ ആദ ശർമ്മ പറയുന്നു.
ഫോൺ നമ്പർ പുറത്ത് വിട്ടയാൾ സമാനമായ പ്രവർത്തനങ്ങൾ നേരത്തേയും നടത്തിയിട്ടുണ്ടെന്നാണ് വിവരം. പോലീസുകാർ ഇയാളെ കണ്ടെത്തിയിട്ടുണ്ടെന്നും ആദ ശർമ്മ പറയുന്നു. ” ഭീകരതയ്‌ക്കെതിരെ സംസാരിക്കുന്ന ഒരു സിനിമയോടൊപ്പമാണ് ഞാൻ നിൽക്കുന്നത്. നമ്മുടെ ദേശീയ സുരക്ഷ ഏത് രീതിയിലെല്ലാം ഭീഷണിയാണെന്ന് ചിത്രം പറയുന്നു. ഒരു തീവ്രവാദി അവൻ ഉദ്ദേശിച്ച രീതിയിൽ കാര്യങ്ങൾ നടക്കാതെ വന്നതോടെ ഭീഷണിപ്പെടുത്തുന്നതിന്റെ ഉദാഹരണം കൂടിയാണിത്. ഭീകരവാദത്തെ തുറന്നു കാട്ടുന്ന ചിത്രമാണ് ദി കേരള സ്റ്റോറി. അതുകൊണ്ട് തന്നെ ഇതിൽ ഉൾപ്പെട്ടവരെ ഇക്കാര്യങ്ങൾ രോഷാകുലരാക്കുമെന്നും” ആദ ശർമ്മ പറയുന്നു.
