ന്യൂഡൽഹി: പ്രധാനമന്ത്രി നരേന്ദ്ര മോദിയുടെ നേതൃത്വത്തിലുള്ള കേന്ദ്രസർക്കാർ, ഭരണത്തിലേറിയിട്ട് ഇന്ന് 9 വർഷം പൂർത്തിയാക്കുകയാണ്.2014 മേയ് 26നാണ് മോദി പ്രധാനമന്ത്രിയായി സത്യപ്രതിജ്ഞ ചെയ്ത് അധികാരമേറ്റെടുത്തത്. 2019 മേയ് 30നായിരുന്നു രണ്ടാംതവണ സത്യപ്രതിജ്ഞ ചെയ്തത്.
ഇതോടനുബന്ധിച്ച് സർക്കാരിന്റെ പ്രവർത്തനനേട്ടങ്ങൾ വിശദീകരിക്കാൻ ഒരുമാസത്തെ ജനസമ്പർക്ക അഭിയാൻ പരിപാടിക്ക് തുടക്കമായി. ഈവർഷം നടക്കുന്ന നാലു നിയമസഭാ തിരഞ്ഞെടുപ്പുകൾക്കും അടുത്തവർഷം നടക്കാനിരിക്കുന്ന ലോക്സഭാ തിരഞ്ഞെടുപ്പിനും പാർട്ടിയെ സജ്ജമാക്കാനുള്ള നടപടികൾക്ക് ഇതോടൊപ്പം ബി.ജെ.പി. രൂപം നൽകും.
കഴിഞ്ഞ 9 വർഷം കേന്ദ്രസർക്കാർ നടപ്പാക്കിയതും നടപ്പാക്കാൻ പോകുന്നതുമായ പദ്ധതികളെക്കുറിച്ച് എല്ലാ കേന്ദ്രമന്ത്രിമാരും വിവിധസംസ്ഥാനങ്ങളിൽ ഇന്നലെ വാർത്താസമ്മേളനം നടത്തിയിരുന്നു. ബിജെപി ഭരിക്കുന്ന സംസ്ഥാനങ്ങളിൽ അതതു മുഖ്യമന്ത്രിമാരും പങ്കെടുത്തു. കഴിഞ്ഞദിവസം പാർലമെന്റ് ഉദ്ഘാടനത്തിനുശേഷം ബിജെപി മുഖ്യമന്ത്രിമാരുടെ യോഗം പ്രധാനമന്ത്രിയുടെ അദ്ധ്യക്ഷതയിൽ ചേർന്നിരുന്നു.
9YearsOfModiGovernment ഹാഷ്ടാഗ് ട്വിറ്ററിൽ ട്രെൻഡിംഗായി മാറിയിരിക്കുകയാണ്. ഇത് ചൂണ്ടിക്കാട്ടിയ പ്രധാനമന്ത്രി ജനങ്ങൾ കാണിക്കുന്ന സ്നേഹത്തിന് നന്ദി പറഞ്ഞു.
പ്രധാനമന്ത്രിയുടെ വാക്കുകൾ ഇങ്ങനെ
‘9YearsOfModiGovernment എന്ന ഹാഷ്ടഗിൽ നിരവധി ട്വീറ്റുകളാണ് ഞാൻ കാണുന്നത്. അതിൽ 2014 മുതലുള്ള നമ്മുടെ സർക്കാരിനെക്കുറിച്ച് അവർ അഭിനന്ദിച്ച കാര്യങ്ങളാണ് ഉയത്തിക്കാട്ടുന്നത്. അത്തരം സ്‌നേഹ വാത്സല്യങ്ങൾ ലഭിക്കുന്നത് വിനയത്തോടെ സ്വീകരിക്കുന്നു. മാത്രമല്ല, ഇത് ജനങ്ങൾക്ക് വേണ്ടി കൂടുതൽ കഠിനാധ്വാനം ചെയ്യാനുള്ള ശക്തിയും നൽകുന്നു.’ പ്രധാനമന്ത്രി ട്വിറ്ററിൽ കുറിച്ചു.
മെയ് 31 ന് രാജസ്ഥാനിലെ അജ്മീറിൽ നടത്തുന്ന മെഗാ റാലിയിലൂടെ പ്രചാരണ ക്യാമ്പയിൻ പ്രധാനമന്ത്രി ഉദ്ഘാടനം ചെയ്യുമെന്നാണ് വിവരം. ബിജെപി ദേശീയ അദ്ധ്യക്ഷൻ ജെപി നദ്ദ, കേന്ദ്ര ആഭ്യന്തര മന്ത്രി അമിത് ഷാ, പ്രതിരോധ മന്ത്രി രാജ്നാഥ് സിംഗ് തുടങ്ങിയവരും ജനകീയ പ്രചാരണത്തിൽ പങ്കെടുക്കും
