ലക്‌നൗ: പ്രധാനമന്ത്രി ആരാണെന്ന് ഐഎൻഡിഐഎ സഖ്യം അധികാരത്തിലെത്തിയ ശേഷം തീരുമാനിക്കുമെന്ന് കോൺഗ്രസ് നേതാവ്. യുപിയിലെ കോൺഗ്രസ് നേതാവ് പിഎൽ പുനിയ ആണ് ഇക്കാര്യം പറഞ്ഞത്. അതാണ് ഐഎൻഡിഐഎയുടെ തീരുമാനമെന്നും പുനിയ പറഞ്ഞു. പ്രതിപക്ഷ പാർട്ടികളുടെ ഐക്യമായ ഐഎൻഡിഐഎയിൽ പ്രധാനമന്ത്രി സ്ഥാനത്തേക്ക് ആരെ ഉയർത്തിക്കാട്ടുമെന്നുളള ചർച്ചകൾ സജീവമാണ്. ഇതിനിടയിലാണ് കോൺഗ്രസ് നേതാവിന്റെ പ്രതികരണം.
അധികാരത്തിലെത്തിയാൽ ഐഎൻഡിഐഎ എംപിമാർ ചേർന്ന് പ്രധാനമന്ത്രിയെ തിരഞ്ഞെടുക്കുമെന്നും പുനിയ വ്യക്തമാക്കി. അമേഠിയിലെ ജനങ്ങൾ ഇക്കുറി സ്മൃതി ഇറാനിയെ അവിടെ പരാജയപ്പെടുത്തുമെന്ന് ഉറപ്പാണ്. കോൺഗ്രസിന്റെ എംപിയായിരിക്കും അവിടെ വിജയിക്കുകയെന്നും പുനിയ പറയുന്നു.
2019 ലെ തിരഞ്ഞെടുപ്പിൽ രാഹുൽ ഗാന്ധിയെ തോൽപിച്ചാണ് സ്മൃതി ഇറാനി അമേഠിയിൽ വിജയിച്ചത്. കോൺഗ്രസിന്റെ പരമ്പരാഗത ശക്തികേന്ദ്രങ്ങളിൽ ഒന്നായിരുന്നു അമേഠി. 26 പ്രതിപക്ഷ പാർട്ടികളുടെ കൂട്ടായ്മയാണ് ഐഎൻഡിഐഎ സഖ്യം. തിരഞ്ഞെടുപ്പിന് മുൻപുളള ഒരുക്കങ്ങൾ ചർച്ച ചെയ്യാനായി ജൂണിൽ പറ്റ്‌നയിലും ജൂലൈയിൽ കർണാടകയിലും ഐഎൻഡിഐഎ നേതാക്കൾ യോഗം ചേർന്നിരുന്നു.
