മുംബൈ: ഇന്ത്യൻ ബോക്സ് ഓഫീസിൽ സണ്ണി ഡിയോൾ ചിത്രം ഗദാർ 2ന്റെ തേരോട്ടം തുടരുന്നു. ഏറ്റവും വേഗത്തിൽ 450 കോടി കളക്ഷൻ ഇന്ത്യയിൽ നിന്നും മാത്രം നേടിയ ചിത്രം എന്ന റെക്കോർഡാണ് ഗദാർ 2 സ്വന്തമാക്കിയിരിക്കുന്നത്. വെറും 17 ദിവസം കൊണ്ടാണ് ചിത്രം ഈ നേട്ടത്തിൽ എത്തിയിരിക്കുന്നത്.
ഇതോടെ 18 ദിവസം കൊണ്ട് ഷാരൂഖ് ഖാൻ ചിത്രം പഠാൻ ഇന്ത്യയിൽ നിന്നും നേടിയ 450 കോടി എന്ന റെക്കോർഡ് പഴങ്കഥയായി. 20 ദിവസം കൊണ്ട് 450 കോടി നേടിയ ബാഹുബലി 2 ആണ് മൂന്നാം സ്ഥാനത്ത്.
2001ൽ റിലീസ് ചെയ്ത ഗദാർ: ഏക് പ്രേം കഥയുടെ രണ്ടാം ഭാഗമാണ് ഗദാർ 2. അനിൽ ശർമ്മയാണ് ചിത്രത്തിന്റെ സംവിധായകൻ. ഒന്നാം ഭാഗത്തിന്റെ പശ്ചാത്തലം ഇന്ത്യാ വിഭജനം ആയിരുന്നുവെങ്കിൽ, 1971ലെ ബംഗ്ലാദേശ് യുദ്ധമാണ് രണ്ടാം ഭാഗത്തിന്റെ പശ്ചാത്തലം. സണ്ണി ഡിയോൾ നായകനായ ചിത്രത്തിൽ അമീഷ പട്ടേൽ, ഉത്കർഷ് ശർമ്മ, മാനീഷ് വാധ്വ എന്നിവരും പ്രധാന കഥാപാത്രങ്ങളെ അവതരിപ്പിച്ചിരിക്കുന്നു.
പ്രണയം, ദേശസ്നേഹം, സംഘട്ടനം എന്നിവയ്ക്ക് പ്രാധാന്യം നൽകി ഒരുക്കിയിരിക്കുന്ന ഗദാർ 2ന്റെ ഏറ്റവും വലിയ സവിശേഷത സണ്ണി ഡിയോളിന്റെ ഗംഭീര സ്ക്രീൻ പ്രസൻസും പ്രകടന മികവുമാണ്.
