സമൂഹമാദ്ധ്യമങ്ങളിൽ ഇപ്പോൾ തരംഗമാകുന്നത്
അമ്മയുടെ വിവാഹച്ചടങ്ങിൽ ഒരു മകൻ നടത്തിയ വികാരനിർഭരമായ പ്രസംഗമാണ്. ഹൃദയസ്പർശിയായ ഈ വീഡിയോ ഇപ്പോൾ നിരവധി പേരാണ് പങ്കുവെക്കുന്നത്. ഇൻസ്റ്റാഗ്രാമിലാണ് ഈ വീഡിയോ പോസ്റ്റ് ചെയ്തിരിക്കുന്നത്. അമ്മയുടെ രണ്ടാം വിവാഹ ചടങ്ങിന് മകൻ ഹൃദയംഗമമായ വികാരങ്ങൾ പങ്കുവെക്കുകയും അമ്മയും രണ്ടാനച്ഛനും അവന്റെ വാക്കുകൾ ശ്രദ്ധയോടെ കേൾക്കുകയും ചെയ്യുന്നതാണ് വീഡിയോ.
“എല്ലാവർക്കും ശുഭസായാഹ്നം. എന്റെ പേര് ജോർദാൻ. ഞാൻ വധുവിന്റെ മകനാണ്. വരനായ വിന്നി എനിക്ക് ഏറ്റവും പ്രിയപ്പെട്ട ആളാണ്. ഞാൻ കണ്ട ഏറ്റവും നല്ല മനുഷ്യൻ കൂടിയാണ് അദ്ദേഹം. ഇപ്പോൾ ഔദ്യോഗികമായി അദ്ദേഹം എന്റെ രണ്ടാനച്ഛനാണ്. അത് ഞാൻ ഭാഗ്യമായി കരുതുന്നു.” എന്ന് തുടങ്ങുന്നതായിരുന്നു അമ്മയുടെ വിവാഹത്തിൽ മകൻ ജോർദാൻ നടത്തിയ ഹൃദയഹാരിയായ പ്രസംഗം.
” എന്റെ ജീവിതത്തിലെ ആദ്യത്തെ സ്നേഹവും പ്രണയവും എല്ലാം എന്റെ അമ്മയാണ്. ഇപ്പോൾ എന്റെ അമ്മ അവരുടെ ജീവിതത്തിലെ യഥാർത്ഥ പ്രണയം കണ്ടെത്തിയിരിക്കുന്നു. ഈ സന്ദർഭത്തിൽ അമ്മയോടും വിന്നിയോടും ഒപ്പം നിൽക്കാൻ വളരെ സന്തോഷമുണ്ട്. വിന്നി അമ്മയുടെ മാത്രമല്ല എന്റെയും ജീവിതത്തിലെ ഭാഗ്യമാണ് “. എന്നിങ്ങനെയായിരുന്നു ആ മകന്റെ വാക്കുകൾ. ഗുഡ് ന്യൂസ് മൂവ്‌മെന്റ് എന്ന ഇൻസ്റ്റാഗ്രാം പേജ് പങ്കുവെച്ച ഈ വീഡിയോ ഇപ്പോൾ നിരവധി പേരാണ് കണ്ടിരിക്കുന്നത്. അമ്മയെയും രണ്ടാനച്ഛനെയും കുറിച്ചുള്ള മകന്റെ ഈ വാക്കുകൾ ശരിക്കും കണ്ണ് നിറയ്ക്കുന്നതാണെന്നാണ് വീഡിയോ കണ്ടവർ അഭിപ്രായം രേഖപ്പെടുത്തുന്നത്.
