ലഡാക്ക്: ലഡാക്കിൽ 230 കിലോമീറ്റർ ദൂരത്തിലുള്ള കാർഗിൽ-സൻസ്കർ റോഡിന്റെ നവീകരണ പ്രവർത്തനങ്ങൾ ആരംഭിച്ചതായി കേന്ദ്ര ഗതാഗതമന്ത്രി നിതിൻ ഗഡ്കരി. ദേശീയ പാത 301ൽ വരുന്ന പ്രധാന ഭാഗമാണിത്. എട്ട് വിഭാഗങ്ങളായി തിരിച്ചാണ് പദ്ധതി നടപ്പാക്കുന്നത്. നവീകരണത്തിന്റെ ഭാഗമായി റോഡിന്റെ വീതി കൂട്ടൽ അടക്കം നടത്തുന്നുണ്ട്.
ഇതിൽ അഞ്ച് പാക്കേജുകൾ പൂർത്തിയാക്കി. ഈ സാമ്പത്തിക വർഷത്തിനുള്ളിൽ തന്നെ പാക്കേജ് 6,7 എന്നിവ നടപ്പിലാക്കാനാണ് ലക്ഷ്യമിടുന്നത്. 97.726 കിലോമീറ്റർ ദൂരമാണ് അടുത്ത 6,7,8 പാക്കേജുകളിലായി ഉൾപ്പെടുത്തിയിരിക്കുന്നത്. 13 വലിയ പാലങ്ങൾ, 18 ചെറിയ പാലങ്ങൾ, 620 ബോക്സ് കൾവർട്ടുകൾ എന്നിവ ഇതിൽ ഉൾപ്പെടുന്നു.
പ്രദേശത്തിന്റെ ഭൂപ്രകൃതിയാണ് നിലവിൽ പദ്ധതിക്ക് വെല്ലുവിളി ഉയർത്തുന്ന പ്രധാന ഘടകം. കൊടും തണുപ്പ്, കുത്തനെയുള്ള കുന്നുകൾ, ചെരിവുകൾ, ഓക്സിജൻ കുറവ് തുടങ്ങിയവയെ മറികടന്നാണ് റോഡ് നിർമാണം മുന്നോട്ട് പോകുന്നത്. റോഡ് നിർമാണം പൂർത്തിയാകുന്നതോടെ സൈനികർക്ക് തന്ത്രപ്രധാന മേഖലകളിലേക്ക് അതിവേഗം സഞ്ചരിക്കുന്നതിനുള്ള സൗകര്യം ലഭ്യമാകും. മേഖലയിലെ സാമ്പത്തിക വികസനത്തിനും വിനോദസഞ്ചാര മേഖലയ്ക്കും പദ്ധതി പുത്തനുണർവ് നൽകുമെന്നും നിതിൻ ഗഡ്കരി വ്യക്തമാക്കി.
Discussion about this post