കണ്ണൂർ: പരിയാരത്ത് വൃദ്ധയെ വീടിനുള്ളിൽ കെട്ടിയിട്ട് മോഷണം. അമ്മാനപ്പാറയിൽ ഡോക്ടർ ഷക്കീറിന്റെ വീട്ടിലാണ് സംഭവം. 10 പവനോളം സ്വർണം മോഷണം പോയി.
ഇന്നലെ രാത്രിയോടെയായിരുന്നു സംഭവം. മോഷ്ടാക്കൾ എത്തുമ്പോൾ വയോധികയും ബന്ധുവായ സ്ത്രീയും രണ്ട് ചെറിയ കുട്ടികളും മാത്രമാണ് ഉണ്ടായിരുന്നത്. ഷക്കീറും ഭാര്യയും തിരുവനന്തപുരത്തേക്ക് പോയിരുന്നു.
നാലംഗ സംഘമായിരുന്നു മോഷണത്തിനായി വീട്ടിൽ എത്തിയത്. ജനൽ കമ്പി മുറിച്ചാണ് ഇവർ അകത്തു കടന്നത്. ഇതിന് മുന്നോടിയായി വീട്ടിലെ സിസിടിവികൾ തുണിയിട്ട് മൂടിയിരുന്നു. മുഖം മൂടി ധരിച്ചായിരുന്നു ഇവർ വീട്ടിലേക്ക് അതിക്രമിച്ച് കടന്നത് എന്നാണ് വയോധികയുടെ മൊഴി.
മുറിയിലേക്ക് കടന്ന ഇവർ വയോധികയെ കെട്ടിയിട്ടിരുന്നു. ശബ്ദം പുറത്തുവരാതിരിക്കാൻ മുഖത്ത് പ്ലാസ്റ്ററും ഒട്ടിച്ചിരുന്നു. പുലർച്ചെ ഷക്കീറും ഭാര്യയും വീട്ടിൽ തിരിച്ച് എത്തിയപ്പോഴായിരുന്നു മോഷണ വിവരം അറിഞ്ഞത്. ഇവരുടെ ദേഹത്തുണ്ടായിരുന്ന സ്വർണവും അലമാരയിൽ സൂക്ഷിച്ചിരുന്ന ആഭരണങ്ങളുമാണ് മോഷണം പോയത്. സംഭവത്തിൽ പോലീസ് ഊർജ്ജിത അന്വേഷണം ആരംഭിച്ചു. പ്രദേശത്ത് മോഷണം പതിവാണെന്നാണ് പ്രദേശവാസികൾ പറയുന്നത്.
