തിരുവനന്തപുരം : ബാറിൽ ആക്രമണം നടത്തിയ ഗുണ്ടകൾ ജീവനക്കാരന്റെ കഴുത്തിൽ കത്തി വെച്ച് പണം കവർന്നു. തിരുവനന്തപുരം ആറ്റിങ്ങലിലാണ് സംഭവം. ആറ്റിങ്ങലിലെ ദേവ് റസിഡൻസി ബാറിലാണ് ഗുണ്ടാസംഘം ആക്രമണം നടത്തിയത്. ബാറിൽ എത്തി മദ്യപിച്ച ശേഷമാണ് ഗുണ്ടാസംഘം ജീവനക്കാരന്റെ കഴുത്തിൽ കത്തി വെച്ച് പണം കവർന്നത്.
സംഭവത്തെ തുടർന്ന് വെള്ളൂർക്കോണം സ്വദേശിയായ വിഷ്ണു എന്ന യുവാവിനെ പോലീസ് കസ്റ്റഡിയിൽ എടുത്തിട്ടുണ്ട്. ബാറിലെ സിസിടിവി ദൃശ്യങ്ങളിൽ നിന്നുമാണ് ഇയാളും സംഘവുമാണ് ആക്രമണം നടത്തിയത് എന്ന് പോലീസ് തിരിച്ചറിഞ്ഞത്. നിരവധി ക്രിമിനൽ കേസുകളിൽ പ്രതിയാണ് വിഷ്ണുവെന്ന് പോലീസ് അറിയിച്ചു.
കഴിഞ്ഞദിവസം രാത്രിയാണ് വിഷ്ണുവും മറ്റുചിലരും ചേർന്ന് ദേവ് റസിഡൻസി ബാറിൽ എത്തുന്നത്. ഇവർ പാട്ടുപാടി ആഘോഷിക്കുകയും മദ്യപിക്കുകയും ചെയ്യുന്ന ദൃശ്യങ്ങൾ സിസിടിവിയിൽ വ്യക്തമാണ്. മദ്യപാനത്തിനു ശേഷമാണ് ഇവർ ജീവനക്കാരന്റെ കഴുത്തിൽ കത്തി വെച്ച് പണം കവരുന്നത്. സംഭവത്തിൽ പോലീസ് കൂടുതൽ അന്വേഷണം നടത്തിവരികയാണ്.
