വയറ്റിൽ കൊഴുപ്പടിയുന്നതിന് പ്രധാന കാരണം നമ്മുടെ ആഹാര കാര്യങ്ങളിലെ അശ്രദ്ധയാണ്. അതിൽ തന്നെ രാത്രിയിൽ കഴിക്കുന്ന ഭക്ഷണമാണ് പലപ്പോഴും വില്ലൻ ആകുന്നത്. രാത്രിയിലെ ഭക്ഷണത്തിന്റെ കാര്യത്തിൽ എന്ത് കഴിക്കുന്നു എപ്പോൾ കഴിക്കുന്നു എന്നുള്ള ഒരു രണ്ടു കാര്യങ്ങൾ പ്രധാനമാണ്. ഉറങ്ങാൻ പോകുന്നതിനു മൂന്നു മണിക്കൂർ മുമ്പ് എങ്കിലും അത്താഴം കഴിച്ചിക്കുന്നത് അമിതവണ്ണം അകറ്റാനും വയറ്റിൽ കൊഴുപ്പ് അടിയുന്നത് തടയാനും സഹായിക്കുന്നതാണ്.
രാത്രി കഴിക്കുന്ന ഭക്ഷണം എപ്പോഴും ലഘുവായതും മിതമായ അളവിലും ആയിരിക്കാൻ ശ്രദ്ധിക്കേണ്ടതാണ്. അത്താഴം അത്തിപ്പഴത്തോളം എന്ന പഴഞ്ചൊല്ല് വെറുതെയല്ല എന്നാണ് ആധുനികശാസ്ത്രവും പറയുന്നത്. രാത്രിയിൽ കാർബോഹൈഡ്രേറ്റ് അധികമായുള്ള ഭക്ഷണങ്ങൾ പരമാവധി ഒഴിവാക്കുക. പ്രത്യേകിച്ചും ചോറു പോലെയുള്ള ഭക്ഷണങ്ങളിൽ ധാരാളം കാർബോഹൈഡ്രേറ്റ് അടങ്ങിയിട്ടുണ്ട്. അതിനാൽ തന്നെ രാത്രിയിൽ ചോറ് ഒഴിവാക്കുന്നതാണ് ഏറ്റവും ഉത്തമം. കാർബോഹൈഡ്രേറ്റിന്റെ അളവ് കൂടുന്നതാണ് വയറ്റിലെ കൊഴുപ്പിന്റെ അളവ് കൂടുന്നതിന് ഒരു പ്രധാന കാരണം.
രാത്രി ഭക്ഷണത്തിൽ ശ്രദ്ധിക്കേണ്ട മറ്റൊരു കാര്യം നിങ്ങൾക്ക് എത്രത്തോളം വിശപ്പുണ്ടെന്ന് സ്വയം മനസ്സിലാക്കി അതിനനുസരിച്ച് ആവശ്യമുള്ള ഭക്ഷണം മാത്രം കഴിക്കുക എന്നുള്ളതാണ്. വലിയ വിശപ്പില്ലെങ്കിൽ എന്തെങ്കിലും പഴവർഗ്ഗങ്ങൾ മാത്രം കഴിച്ചുകൊണ്ട് രാത്രി ഉറങ്ങാവുന്നതാണ്. കലോറി കൂടുതലുള്ള ഭക്ഷണങ്ങൾ, ചുവന്ന മാംസം, ജങ്ക് ഫുഡ് എന്നിവയൊന്നും ഒരിക്കലും രാത്രി കഴിക്കരുത്. വിശപ്പിന് അനുസരിച്ച് പച്ചക്കറി സലാഡോ നാരുകൾ കൂടുതൽ അടങ്ങിയ പഴവർഗ്ഗങ്ങളോ അണ്ടിപ്പരിപ്പ് വർഗ്ഗങ്ങളോ കഴിക്കുന്നത് വഴി ദഹനം മികച്ച രീതിയിൽ നടക്കാനും വയറ്റിൽ കൊഴുപ്പ് അടിയുന്നത് കുറയ്ക്കാനും സഹായിക്കുന്നതാണ്.
