മുംബൈ : കഴിഞ്ഞ ദിവസമാണ് തന്റെ വീട്ടു ജോലിക്കാരിയുടെ മകളെ കാണാനില്ലെന്ന കുറിപ്പുമായി ബോളിവുഡ് താരം സണ്ണി ലിയോണ്‍ രംഗത്തെത്തിയത്. അനുഷ്‌ക എന്ന 9 വയസ്സുകാരിയെ കാണാനില്ലെന്നും കണ്ടെത്താന്‍ സഹായിക്കുന്നവര്‍ക്ക് പാരിതോഷികം ലഭിക്കുന്നതായിരിക്കും എന്ന് കാട്ടിയായിരുന്നു പോസ്റ്റ്. ഇന്‍സ്റ്റഗ്രാമിലൂടെയായിരുന്നു താരത്തിന്റെ അഭ്യര്‍ഥന.
എന്നാല്‍ പെണ്‍കുട്ടി സുരക്ഷിതയായി വീട്ടില്‍ തിരിച്ചെത്തിയ സന്തോഷ വാര്‍ത്തയുമായാണ് നടി വീണ്ടുമെത്തിയത്. മാതാപിതാക്കളോടൊപ്പമുള്ള കുട്ടിയുടെ ചിത്രവും സണ്ണി ഇന്‍സ്റ്റഗ്രാമില്‍ പോസ്റ്റ് ചെയ്തിട്ടുണ്ട്. ‘ഞങ്ങളുടെ പ്രാര്‍ഥനകള്‍ക്ക് ഉത്തരം കിട്ടി. ദൈവം വലിയവനാണ്. ഈ കുടുംബത്തെ ദൈവം അനുഗ്രഹിക്കട്ടെ. കുട്ടിയെ കണ്ടെത്താന്‍ സഹായിച്ച മൂംബൈ പോലീസിന് കുടുംബത്തിന്റെ പേരില്‍ നന്ദി അറിയിക്കുന്നു. അനുഷ്‌കയെ നഷ്ടപ്പെട്ട് 24 മണിക്കൂറിനുള്ളില്‍ അവളെ ഞങ്ങള്‍ക്ക് തിരികെ കിട്ടി. പോസ്റ്റ് ഷെയര്‍ ചെയ്ത് വൈറലാക്കിയതിന് എന്നെ സ്‌നേഹിക്കുന്ന എല്ലാവര്‍ക്കും നന്ദി’, സണ്ണി കുറിച്ചു.
നവംബര്‍ എട്ടാം തീയതി വൈകിട്ട ഏഴു മണി മുതലാണ് മുംബൈയിലെ ജോഗേശ്വരിയില്‍ നിന്നും അനുഷ്‌കയെ കാണാതായത്. കുട്ടിയെ കണ്ടെത്താന്‍ സഹായിക്കുന്നവര്‍ക്ക് കുടുംബം പതിനോരായിരം രൂപ നല്‍കുമെന്ന് പ്രഖ്യാപിച്ചിരുന്നു. ഇത് കൂടാതെ നടിയുടെ വക അമ്പതിനായിം രൂപയും പ്രതിഫലമായി പ്രഖ്യാപിച്ചിരുന്നു. ഇതോടെ പോസ്റ്റ് വലിയ രീതിയില്‍ വൈറലായിരുന്നു.
