ജനങ്ങളുടെ എണ്ണം കുറഞ്ഞുവരുന്നു ; സ്ത്രീകൾ ഇനിമുതൽ കൂടുതൽ കുഞ്ഞുങ്ങളെ പ്രസവിക്കണം ; വികാരാധീനനായി കിം ജോങ് ഉൻ

ഉത്തരകൊറിയൻ ഭരണാധികാരി കിം ജോങ് ഉൻ വളരെ വികാരാധീനനായി കണ്ണുനീർ തുടച്ചുകൊണ്ട് സംസാരിക്കുന്ന ഒരു വീഡിയോ ഇപ്പോൾ സമൂഹമാദ്ധ്യമങ്ങളിൽ വൈറലാണ്. ഉത്തരകൊറിയയിലെ ജനസംഖ്യ വളരെ കുറഞ്ഞുകൊണ്ടിരിക്കുകയാണ് എന്നുള്ളതാണ് കിമ്മിനെ കണ്ണീരിലാഴ്ത്താൻ ഉണ്ടായ കാരണം. ജനസംഖ്യ നിരക്ക് വളരെ കുറയുന്നതിനാൽ ഉത്തരകൊറിയയിലെ സ്ത്രീകൾ കൂടുതൽ കുഞ്ഞുങ്ങളെ പ്രസവിക്കണമെന്ന് കിം കരഞ്ഞുകൊണ്ട് ആവശ്യപ്പെട്ടു.

ഞായറാഴ്ച തലസ്ഥാനമായ  പ്യോങ്‌യാങ്ങിൽ അമ്മമാർക്കായി നടത്തിയ ഒരു പരിപാടിക്കിടയിലാണ് കിം ഇത്തരത്തിൽ വികാരാധീനനായി കാണപ്പെട്ടത്. പാർട്ടി ചുമതലകളും രാജ്യത്തിന്റെ ഭരണ ചുമതലയും കൂടി ഒന്നിച്ച് കയ്യാളുന്നത് ബുദ്ധിമുട്ടുണ്ടാക്കുന്ന സമയങ്ങളിൽ ഞാൻ അമ്മമാരെ കുറിച്ച് ചിന്തിക്കാറുണ്ടെന്ന് കിം പറഞ്ഞു. ദേശീയ ശക്തിയെ ശക്തിപ്പെടുത്തുന്നതിൽ അമ്മമാർ വഹിച്ച പങ്കിന് അദ്ദേഹം നന്ദി അറിയിക്കുകയും ചെയ്തു.

ഏകദേശം രണ്ടരക്കോടി  ജനസംഖ്യയുള്ള ഉത്തരകൊറിയയിൽ കഴിഞ്ഞ ഏതാനും ദശകങ്ങളായി ജനനിരക്ക് വളരെ കുറഞ്ഞുകൊണ്ടിരിക്കുകയാണ്.  ഉത്തരകൊറിയയിൽ 1970-80 കാലഘട്ടങ്ങളിൽ ജനസംഖ്യ വർദ്ധിക്കുന്നതായിരുന്നു പ്രശ്നം. തുടർന്ന് ജനന നിയന്ത്രണ പദ്ധതികൾ ഭരണകൂടം നടപ്പിലാക്കിയിരുന്നു. എന്നാൽ 1990 നു ശേഷം ഭക്ഷ്യക്ഷാമം രൂക്ഷമായതോടെ ജനന നിരക്ക് സ്വാഭാവികമായി തന്നെ വലിയ രീതിയിൽ കുറയുകയായിരുന്നു.