കൊച്ചി; 2023 ലെ ആദ്യ മാസങ്ങളിൽ തീയറ്ററുകളിൽ ഉത്സവം തീർത്ത മാളികപ്പുറം സിനിമയുടെ തിരക്കഥാകൃത്തും സംവിധായകനും പുതിയ പ്രൊജക്ടിൽ വീണ്ടും ഒരുമിക്കുന്നു. മാളികപ്പുറം തിരക്കഥയിലൂടെ മലയാളത്തിലെ മുൻനിര യുവതിരക്കഥാകൃത്തായി മാറിയ അഭിലാഷ് പിളള സോഷ്യൽ മീഡിയയിലൂടെ ആണ് ഇക്കാര്യം പുറത്തുവിട്ടത്.
മാളികപ്പുറത്തിന്റെ ഗംഭീര വിജയത്തിന് ശേഷം വീണ്ടും ഇരുവരും ഒരുമിക്കുന്നുവെന്നത് പ്രേക്ഷകർക്കും വലിയ പ്രതീക്ഷ നൽകുന്നുണ്ട്. 2023 ലെ ആദ്യ ഫാമിലി സൂപ്പർഹിറ്റായിരുന്നു മാളികപ്പുറം. 2022 ഡിസംബർ 30 ന് പുറത്തിറങ്ങി 2023 ലെ ആദ്യ മാസങ്ങളിൽ തിയറ്ററുകൾ നിറഞ്ഞോടിയ ചിത്രമായിരുന്നു മാളികപ്പുറം. കുടുംബപ്രേക്ഷകരെ തിയറ്ററിലേക്ക് വലിയ തോതിൽ എത്തിച്ച ചിത്രം കൂടിയാണിത്.
2024 ഓണം തിയറ്ററിൽ നമ്മൾ ആഘോഷിക്കും, മാളികപ്പുറത്തിന് ശേഷം ഞങ്ങൾ വീണ്ടും ഒരുമിക്കുന്നുവെന്നാണ് അഭിലാഷ് പിളളയുടെ വാക്കുകൾ. ചിത്രീകരണം ഉടൻ ആരംഭിക്കുമെന്നും അഭിനേതാക്കളെയും അണിയറ പ്രവർത്തകരെയും വൈകാതെ പ്രഖ്യാപിക്കുമെന്നും അഭിലാഷ് പിള്ള വെളിപ്പെടുത്തി. ഉണ്ണി മുകുന്ദന്റെ കരിയർ ബ്രേക്കിങ് ചിത്രമായിരുന്നു മാളികപ്പുറം. ഉണ്ണി മുകുന്ദൻ തന്നെയാണോ പുതിയ ചിത്രത്തിലും നായകവേഷത്തിലെത്തുകയെന്ന ആകാംക്ഷയുമുണ്ട്.
മാളികപ്പുറം സിനിമയുടെ തിരക്കഥയും സംവിധാന മികവും ഏറെ പ്രശംസിക്കപ്പെട്ടിരുന്നു. ആ ടീമിന്റെ അടുത്ത പ്രൊജക്ട് എന്താകുമെന്ന കാത്തിരിപ്പിലായിരുന്നു സിനിമാ ആസ്വാദകർ. പല വേദികളിൽ നിന്നും ഇതുമായി ബന്ധപ്പെട്ട ചോദ്യങ്ങൾ ഉയർന്നിരുന്നു. മാളികപ്പുറം രണ്ടാം ഭാഗത്തിനായും പ്രേക്ഷകർ പ്രതീക്ഷയോടെ കാത്തിരിക്കുന്നുണ്ട്. രണ്ടാം ഭാഗം ഉണ്ടാകുമെന്ന് അഭിലാഷ് പിളള നേരത്തെ പറഞ്ഞിരുന്നു.
