മുംബൈ: പതിമൂന്നുകാരിയെ ബലാത്സംഗം ചെയ്ത കേസിൽ അറസ്റ്റിലായ 26 കാരന് ജാമ്യം അനുവദിച്ച് ബോംബെ ഹൈക്കോടതി.ഇരുവരും തമ്മിൽ ബന്ധമുണ്ടെന്നും ലൈംഗികബന്ധം പ്രണയം മൂലമാണെന്നും കാമമല്ലെന്നും ചൂണ്ടിക്കാട്ടിയാണ് ജാമ്യം. 26 വയസ്സുകാരനായ നിതിൻ ധബേറാവുവിനാണ് ജാമ്യം ലഭിച്ചത്. ജസ്റ്റിസ് ഊർമിള ജോഷി ഫാൽക്കെയുടെതാണ് ഉത്തരവ്.
പെൺകുട്ടി പ്രായപൂർത്തിയാകാത്തവളാണെന്നും എന്നാൽ അവൾ സ്വമേധയാ വീടുവിട്ടിറങ്ങി പ്രതിയായ നിതിൻ ധബേറാവുവിനൊപ്പമാണ് താമസിച്ചിരുന്നതെന്നും ജസ്റ്റിസ് ഊർമിള ജോഷി ഫാൽക്കെ നിരീക്ഷിച്ചു.പ്രതിക്കും പ്രായം കുറവാണ്. പ്രണയം മൂലമാണ് ഒരുമിച്ചത്; ലൈംഗിക അതിക്രമം നടന്നിട്ടില്ലെന്ന് കോടതി ചൂണ്ടിക്കാട്ടി.
യുവാവിനൊപ്പം വിവിധ സ്ഥലങ്ങളിൽ താമസിച്ചെന്ന് പെൺകുട്ടി സമ്മതിച്ചിട്ടുണ്ടെന്നും കോടതി വ്യക്തമാക്കി. പുസ്തകം വാങ്ങാനെന്ന വ്യാജേന മകൾ 2020 ഓഗസ്റ്റ് 23ന് വീട്ടിൽ നിന്ന് ഇറങ്ങിപ്പോയതായി കുട്ടിയുടെ പിതാവ് പരാതി നൽകിയിരുന്നു.
പ്രതി വിവാഹ വാഗ്ദാനം നൽകിയിരുന്നതായും അതിനാലാണ് വീട്ടിൽ നിന്ന് ആഭരണങ്ങളും പണവും മോഷ്ടിച്ച് ധബേറാവുവിനൊപ്പം താമസിക്കാൻ പോയതെന്നും പെൺകുട്ടി മൊഴി നൽകിയിരുന്നു.
