ബെയ്ജിങ് : പ്രശസ്ത ഫുട്ബോൾ താരം ക്രിസ്റ്റ്യാനോ റൊണാൾഡോയ്ക്ക് പരിക്ക്. റൊണാൾഡോയ്ക്ക് പരിക്കേറ്റതിനെ തുടർന്ന് സൗദി പ്രോ ലീഗ് ക്ലബ് ആയ അൽ നാസർ ചൈനയിൽ നടക്കേണ്ടിയിരുന്ന രണ്ട് സൗഹൃദ മത്സരങ്ങൾ റദ്ദാക്കി. ജനുവരി 24-ന് ഷാങ്ഹായ് ഷെൻഹുവയിലും നാല് ദിവസത്തിന് ശേഷം ഷെജിയാങ്ങിലും അൽ നാസർ ക്ലബ്ബിന്റെ മത്സരങ്ങൾ നിശ്ചയിച്ചിട്ടുള്ളതായിരുന്നു. ഈ മത്സരങ്ങൾക്കായി ചൈനയിൽ എത്തിയ സമയത്താണ് റൊണാൾഡോയ്ക്ക് പരിക്കേറ്റത്.
പരിക്ക് മൂലം റൊണാൾഡോയ്ക്ക് റിയാദ് കപ്പിൽ ലയണൽ മെസ്സിയുടെ ഇന്റർ മിയാമിക്കെതിരായ മത്സരത്തിൽ പങ്കെടുക്കാൻ കഴിയുമോ എന്നതിനെക്കുറിച്ചും ആശങ്ക നിലനിൽക്കുന്നുണ്ട്. ഫെബ്രുവരി ഒന്നിനാണ് റിയാദിൽ അൽ നാസറും ഇന്റർ മിയാമിയും തമ്മിലുള്ള പോരാട്ടം നടക്കാനിരിക്കുന്നത്. നെയ്മറുടെ സൗദി ക്ലബ്ബായ അൽ ഹിലാലുമായും റൊണാൾഡോയുടെ അൽ നാസറിന് റിയാദ് കപ്പിൽ മത്സരം ഉണ്ടായിരുന്നു. എന്നാൽ ഇപ്പോൾ റൊണാൾഡോയ്ക്ക് പരിക്കേറ്റത് മൂലം ഈ മത്സരങ്ങളിൽ കളിക്കാൻ ആകുമോ എന്നാണ് ആശങ്ക.
ചൈനയിൽ നടക്കേണ്ടിയിരുന്ന രണ്ട് സൗഹൃദ മത്സരങ്ങളും മാറ്റിവെച്ചതിനെ തുടർന്ന് ചൈനയിൽ അൽനാസർ ടീം താമസിച്ചിരുന്ന ഹോട്ടലിന് നേരെ ആക്രമണം ഉണ്ടായി. ക്രിസ്റ്റ്യാനോ റൊണാൾഡോയുടെ ചൈനീസ് ആരാധകർ അൽ നാസർ ടീം താമസിച്ചിരുന്ന ഹോട്ടൽ അടിച്ചു തകർക്കുകയായിരുന്നു. ഇതോടെ ചൈനയിലെ സൗഹൃദ മത്സരങ്ങൾ മറ്റൊരു ദിവസം നടത്തുമെന്ന് ക്ലബ് പ്രഖ്യാപിച്ചു.
