മലയാള സിനിമകളുടെ സുവർണ കാലമായിരിക്കുകയാണ് ഫ്രെബുവരി മാസം. തുടർച്ചയായി എത്തുന്ന ചിത്രങ്ങൾ തിയേറ്ററുകളിൽ കാര്യമായാണ് പ്രേഷകരെ എത്തിക്കുന്നത്. അക്കൂട്ടത്തിൽ ഏറ്റവും സൂപ്പർഹിറ്റായി മാറിയിരിക്കുകയാണ് ഗിരിഷ് എ ഡി സംവിധാനം ചെയ്ത പ്രേമലു. നസ്‌ലിൻ, മമിത എന്നിവർ പ്രധാന വേഷമായി എത്തുന്ന ചിത്രം കേരളത്തിൽ നിന്ന് മാത്രം ഒരാഴ്ച കൊണ്ട് വാരി കൂട്ടിയത് പതിനാല് കോടി രൂപയാണ്. നാല് കോടി രൂപ മുടക്ക് മുതലിലാണ് ചിത്രം നിർമ്മിച്ചത് . എന്നാൽ ചിത്രം ആദ്യ രണ്ട് ദിവസം കൊണ്ടുതന്നെ മുതൽമുടക്കു തിരിച്ചുപിടിച്ചിരുന്നു.
മലയാളത്തിൽ സമീപകാലത്ത് ഏറ്റവുമധികം പ്രേക്ഷക പ്രീതി നേടുന്ന ചിത്രങ്ങളിൽ ഒന്നായിരിക്കുകയാണ് പ്രേമലു. ഫ്രെബുവരി 9 നാണ് ചിത്രം തിയറ്ററുകളിൽ എത്തിയത്. ആദ്യ ദിനം തന്നെ മികച്ച അഭിപ്രായമായിരുന്നു ചിത്രത്തിന് ലഭിച്ചിരുന്നത്. ആദ്യ വാരം ചിത്രത്തിന് ഏഴ് കോടിയാണ് ബോക്‌സോഫിസിൽ നിന്ന് നേടിയത്. ആദ്യം ദിനം തൊണ്ണൂറുലക്ഷം കളക്ഷൻ വന്ന സിനിമയ്ക്ക് രണ്ടാം ദിവസം അതിന്റെ ഇരട്ടി തുകയാണ് ലഭിച്ചത്. പിന്നീടങ്ങോട്ട് ചിത്രം കത്തിക്കയറുകയായിരുന്നു.
തണ്ണീർമത്തൻ ദിനങ്ങൾ, സൂപ്പർ ശരണ്യ എന്നീ ചിത്രങ്ങൾക്ക് ശേഷം ഗിരീഷ് എ ഡി സംവിധാനം ചെയ്ത ചിത്രമാണ് പ്രേമലു. ഹൈദരാബാദിന്റെ പശ്ചാത്തലത്തിൽ ഒരുക്കിയ ചിത്രത്തിൽ ശ്യാം മോഹൻ, അഖില ഭാർഗവൻ, സംഗീത് പ്രതാപ്, അൽതാഫ് സലിം, മീനാക്ഷി രവീന്ദ്രൻ Fഎന്നിവരാണ് ചിത്രത്തിലെ മറ്റ് അഭിനേതാക്കൾ. ഗിരീഷ് എഡിയും കിരൺ ജോസിയും ചേർന്നാണ് ചിത്രത്തിന്റെ തിരക്കഥ ഒരുക്കിയിരിക്കുന്നത്.
