കൊല്ലം : ലോക്സഭ തെരഞ്ഞെടുപ്പിൽ വിജയിപ്പിക്കണമെന്ന് അഭ്യർത്ഥിച്ച് കൊല്ലത്തെ എൽഡിഎഫ് സ്ഥാനാർത്ഥിയായ നടൻ മുകേഷ്. തന്റെ ഔദ്യോഗിക ഫേസ്ബുക്ക് അക്കൗണ്ടിലൂടെയാണ് നടൻ ജനങ്ങളുടെ പിന്തുണ തേടികൊണ്ടുള്ള വീഡിയോ പങ്കുവെച്ചത്. തന്റെ ശ്വാസോച്ഛ്വാസത്തില്‍ വരെ കൊല്ലമാണെന്നും മുകേഷ് അഭിപ്രായപ്പെട്ടു.
ഒരുപാട് പേർക്ക് സംശയമുണ്ടായിരുന്നു ഒരു സിനിമ നടനായ ഞാൻ എങ്ങനെ എംഎൽഎ ആയി പ്രവർത്തിക്കുമെന്ന്. ഞാൻ എങ്ങനെയാണ് ഈ മണ്ഡലം കൈകാര്യം ചെയ്യാൻ പോകുന്നത് എന്ന് എല്ലാവരും സംശയിച്ചു. എന്നാൽ കഴിഞ്ഞ ഏഴര കൊല്ലത്തെ എന്റെ ആത്മാർത്ഥമായ പരിശ്രമം കൊണ്ട് 1748 കോടിയുടെ വികസനമാണ് കൊല്ലം മണ്ഡലത്തിൽ ഉണ്ടാക്കിയത് എന്നും മുകേഷ് വ്യക്തമാക്കി.
കൊല്ലം മണ്ഡലത്തിൽ മതേതരത്വം മുറുകെ പിടിച്ചു കൊണ്ടുള്ള സേവനങ്ങൾ ആണ് നടത്തിയിട്ടുള്ളത്. ഏഴര കൊല്ലമായി അഴിമതിരഹിതമായ സേവനമാണ് മുറുകെ പിടിച്ചത്. കൊല്ലം മണ്ഡലത്തിലെ വികസനം നേരിട്ടുവന്ന് കാണാൻ ഞാൻ പല സന്ദർഭങ്ങളിലും പലരെയും ക്ഷണിച്ചിട്ടുണ്ട്. ജനങ്ങൾക്ക് വേണ്ടി കൂടുതൽ സൗകര്യങ്ങളും വികസനങ്ങളും കൊണ്ടുവരാനുള്ള അവസരമായിട്ടാണ് ഈ തെരഞ്ഞെടുപ്പിനെയും കാണുന്നത്. കൊല്ലത്തിന്റെ ശബ്ദം പാർലമെന്റിൽ മുഴങ്ങിക്കേൾക്കാൻ ഇടതുപക്ഷ ജനാധിപത്യ മുന്നണി സ്ഥാനാർത്ഥിയായി മത്സരിക്കുന്ന എന്നെ വൻ ഭൂരിപക്ഷത്തിൽ വിജയിപ്പിക്കണമെന്നും മുകേഷ് വീഡിയോയിലൂടെ അഭ്യർത്ഥിച്ചു.
