തിരുവനന്തപുരം : ബിജെപി അംഗത്വം സ്വീകരിച്ച പത്മജ വേണുഗോപാലിനെതിരെ പ്രതിഷേധവുമായി കെഎസ്‌യു പ്രവർത്തകർ. സെക്രട്ടേറിയറ്റിനു മുൻപിൽ പത്മജാ വേണുഗോപാലിന്റെ ഫോട്ടോ കത്തിച്ചാണ് കെഎസ്‌യു പ്രതിഷേധിച്ചത്. ന്യൂഡൽഹിയിലെ ബിജെപി ആസ്ഥാനത്ത് വെച്ച് പത്മജ വേണുഗോപാൽ ബിജെപി അംഗത്വം സ്വീകരിച്ചതിന് പിന്നാലെയായിരുന്നു തിരുവനന്തപുരത്ത് സെക്രട്ടേറിയറ്റിനു മുൻപിൽ കെഎസ്‌യു പ്രവർത്തകർ പ്രതിഷേധം നടത്തിയത്.
വ്യാഴാഴ്ച വൈകിട്ടാണ് അന്തരിച്ച മുതിർന്ന കോൺഗ്രസ് നേതാവ് കെ കരുണാകരന്റെ മകൾപത്മജ വേണുഗോപാൽ ബിജെപി അംഗത്വം സ്വീകരിച്ചത്. ന്യൂഡൽഹിയിലെ ബിജെപി ആസ്ഥാനത്ത് വെച്ച് പ്രകാശ് ജാവദേക്കറിൽ നിന്നുമായിരുന്നു പത്മജ അംഗത്വം സ്വീകരിച്ചത്. അവസാനകാലങ്ങളിൽ തന്റെ പിതാവും കോൺഗ്രസിന്റെ പ്രവർത്തനങ്ങളിൽ അസംതൃപ്തനായിരുന്നു എന്ന് പത്മജ വേണുഗോപാൽ വ്യക്തമാക്കി.
കഴിഞ്ഞ കുറെ വർഷങ്ങളായി കോൺഗ്രസിൽ നിന്നും കടുത്ത അവഗണനയായിരുന്നു നേരിട്ടിരുന്നത്. കോൺഗ്രസ് ദേശീയ നേതൃത്വത്തിന് പരാതി നൽകിയിരുന്നെങ്കിലും യാതൊരു നടപടിയും ഉണ്ടായില്ല. കോൺഗ്രസിൽ ഇപ്പോൾ ശക്തമായ ഒരു നേതൃത്വം ഇല്ല. എന്നാൽ നരേന്ദ്രമോദി ശക്തനായ നേതാവാണ്. മോദിജിയുടെ കഴിവും നേതൃത്വപാടവുമാണ് തന്നെ ബിജെപിയിലേക്ക് വരാൻ പ്രേരിപ്പിച്ചതെന്നും പത്മജ വേണുഗോപാൽ വ്യക്തമാക്കി.
