തിരുവനന്തപുരം: ചൊവ്വരയിൽ വൻ കഞ്ചാവ് വേട്ട. കാറിൽ കടത്താൻ ശ്രമിച്ച കഞ്ചാവുമായി അഞ്ച് യുവാക്കളെ എക്‌സൈസ് അറസ്റ്റ് ചെയ്തു. രാവിലെയോടെയായിരുന്നു സംഭവം.
കാട്ടാക്കട സ്വദേശി ശരത്, പേരേക്കോണം സ്വദേശികളായ വിഷ്ണു, ശ്രീരാഗ്, അജി ജോർജ്, പാറശ്ശാല സ്വദേശി വിവിൻ എന്നിവരാണ് അറസ്റ്റിലായത്. തമിഴ്‌നാട്ടിൽ നിന്നും കോവളത്തേക്ക് കഞ്ചാവുമായി പോകുകയായിരുന്നു യുവാക്കൾ. ഇതുമായി ബന്ധപ്പെട്ട് എക്‌സൈസിന് രഹസ്യവിവരം ലഭിച്ചിരുന്നു. ഇതേ തുടർന്ന് നടത്തിയ വാഹന പരിശോധനയിൽ ആണ് പ്രതികൾ കുടുങ്ങിയത്. ഇവരുടെ പക്കൽ നിന്നും നാല് കിലോ കഞ്ചാവും പിടിച്ചെടുത്തു.
നെയ്യാറ്റിൻകര എക്‌സൈസിന്റെ നേതൃത്വത്തിലുള്ള സംഘമായിരുന്നു യുവാക്കളെ പിടികൂടിയത്. പാച്ചല്ലൂർ, വെങ്ങാനൂർ, വിഴിഞ്ഞം, കോവളം, എന്നിവിടങ്ങളിൽ വിൽപ്പന നടത്തുന്നതിനായി എത്തിച്ച കഞ്ചാവാണ് ഇതെന്ന് എക്‌സൈസ് ഉദ്യോഗസ്ഥർ അറിയിച്ചു. പ്രതികളെ മജിസ്‌ട്രേറ്റിന് മുൻപിൽ ഹാജരാക്കിയ ശേഷം റിമാൻഡ് ചെയ്തു.
