ബോളിവുഡിലെ അഭിനയ പ്രതിഭ അജയ് ദേവ്ഗണ് നായകനായ ‘ശെയ്ത്താൻ’ വമ്പൻ ഹിറ്റായിരിക്കുകയാണ്. ഗ്യാരണ്ടിയുള്ള ബോളിവുഡ് താരം എന്ന വിശ്വാസം അജയ് ദേവ്ഗണ് നിലനിര്‍ത്തുന്നുവെന്നാണ് അനലിസ്റ്റുകളുടെ വിലയിരുത്തൽ.
ഇന്ത്യൻ ബോക്സ് ഓഫീസില്‍ ഇതിനകം 100 കോടി രൂപയിലധികം ശെയ്ത്താൻ നേടിയെന്നാണ് റിപ്പോര്‍ട്ട്. വിജയ ചിത്രത്തിന് ശേഷം അജയ് പ്രതിഫലം വര്‍ധിപ്പിക്കാനുള്ള സാധ്യത ഏറെയാണെന്നാണ് സൂചന. ബോളിവുഡില്‍ വന്‍ സ്റ്റാറായി നില്‍ക്കുമ്പോഴാണ് അജയ് ദേവ്ഗണ് ദക്ഷിണേന്ത്യൻ സിനിമയിൽ അഭിനയിക്കുന്നത്.
രാജമൗലിയുടെ ആര്‍ആര്‍ആറില്‍ പ്രധാന വേഷത്തിലെത്തിയ രാംചരണിന്റെ പിതാവിന്റെ റോളായിരുന്നു അദ്ദേഹം ചെയ്തത്. കുറച്ച് നേരം മാത്രമേ ചിത്രത്തിലുള്ളൂ എങ്കിലും നിറഞ്ഞുനില്‍ക്കുന്നതായിരുന്നു അജയ് ദേവ്ഗണിന്റെ ഡയലോഗുകള്‍. അതുപോലെ, ആക്ഷന്‍ രംഗങ്ങളും ഏറെ ശ്രദ്ധിക്കപ്പെട്ടിരുന്നു. ചിത്രത്തിലെ അഭിനയത്തിന് ഒരു മിനുട്ടിന് നാല് കോടിയാണ് അജയ് ദേവ്ഗണ് പ്രതിഫലമായി അന്ന് വാങ്ങിയത്. ആർആർആറിൽ എട്ട് മിനുട്ടാണ് അജയിക്ക് ആകെയുണ്ടായിരുന്ന സ്‌ക്രീന്‍ ടൈം. ഇതിനായി 35 കോടിയാണ് താരം പ്രതിഫലമായി വാങ്ങിയത്.
സിംഗം എഗെയിനാണ് അജയിയുടെ വരാനിരിക്കുന്ന ചിത്രം. മൈതാന്‍ എന്ന ചിത്രവും റിലീസാവാനുണ്ട്. ശെയ്ത്താന്റെ വിജയത്തെ തുടർന്ന് താരം പ്രതിഫലം വര്‍ധിപ്പിക്കുമോ എന്നാണ് ആരാധകരും ബോളിവുഡും ഒരുപോലെ ഉറ്റുനോക്കുന്നത്. അജയ് ദേവ്ഗണെ കൂടാതെ മാധവനും ജ്യോതികയുമാണ് ഹൊറര്‍ ചിത്രമായ ശെയ്‍ത്താനിലെ പ്രധാന അഭിനേതാക്കൾ
