ന്യൂഡൽഹി : മദ്യനയ അഴിമതി കേസിൽ എൻഫോഴ്സ്‌മെന്റ് ഡയറക്ടറേറ്റ് അറസ്റ്റ് ചെയ്തു ജയിലിൽ കഴിയുന്ന ഡൽഹി മുഖ്യമന്ത്രി അരവിന്ദ് കെജ്രിവാളിനെതിരായ ഹർജി ഹൈക്കോടതി തള്ളി. കെജ്രിവാളിനെ മുഖ്യമന്ത്രി സ്ഥാനത്തുനിന്നും നീക്കണമെന്ന് ആവശ്യപ്പെട്ടുള്ള പൊതു താൽപര്യ ഹർജിയാണ് ഡൽഹി ഹൈക്കോടതി തള്ളിയത്. ഇക്കാര്യത്തിൽ നിലവിൽ കോടതി ഇടപെടേണ്ട സാഹചര്യം ഇല്ലെന്നാണ് ഹൈക്കോടതി ഈ കേസുമായി ബന്ധപ്പെട്ട് വ്യക്തമാക്കിയത്.
അതേസമയം അരവിന്ദ് കെജ്രിവാളിന്റെ കസ്റ്റഡി കാലാവധി ഇന്ന് തീരുന്ന സാഹചര്യത്തിൽ ഇഡി അദ്ദേഹത്തെ കോടതിയിൽ ഹാജരാക്കിയിട്ടുണ്ട്. കസ്റ്റഡി കാലാവധി നീട്ടി നൽകണമെന്ന് ഇഡി ആവശ്യപ്പെടും. ഡൽഹി റോസ് അവന്യൂ കോടതിയിലാണ് കെജ്രിവാളിനെ ഹാജരാക്കിയിരിക്കുന്നത്.
വൻ സുരക്ഷ സന്നഹങ്ങളോടെയാണ് അരവിന്ദ് കെജ്രിവാളിനെ ഡൽഹി റോസ് അവന്യൂ കോടതിയിൽ ഹാജരാക്കിയിരിക്കുന്നത്. സുരക്ഷയ്ക്കായി കോടതിക്ക് പുറത്ത് കേന്ദ്രസേനയെ വിന്യസിച്ചിട്ടുണ്ട്. ആം ആദ്മി പാർട്ടി നേതാക്കളും ഡൽഹിയിലെ മന്ത്രിമാരും ആയ അതിഷി, സൗരഭ് ഭരദ്വാജ് എന്നിവരും കെജ്രിവാളിന്റെ ഭാര്യ സുനിതയും കോടതിയിൽ എത്തിച്ചേർന്നിട്ടുണ്ട്.
