എറണാകുളം : വൃദ്ധയുടെ കണ്ണിൽ മുളകുപൊടി എറിഞ്ഞശേഷം മാല പൊട്ടിച്ചു. എറണാകുളം ചേന്ദമംഗലത്താണ് സംഭവം നടന്നത്. ചേന്ദമംഗലം കിഴക്കുംപുറം ഭാഗത്ത് കോറ്റട്ടാൽ ക്ഷേത്രത്തിനു സമീപമുള്ള റോഡിലൂടെ നടന്നു പോവുകയായിരുന്ന സുഭദ്ര എന്ന 80 വയസ്സുകാരിയാണ് അതിക്രമത്തിന് ഇരയായത്. കണ്ണിലേക്കു മുളകുപൊടി എറിയുകയും ദേഹോപദ്രവം ഏൽപ്പിക്കുകയും ചെയ്ത ശേഷം ആയിരുന്നു വൃദ്ധയുടെ മാല പൊട്ടിച്ചെടുത്തത്.
എന്നാൽ പ്രതി സ്വർണ്ണമാലയാണെന്ന് കരുതി പൊട്ടിച്ചത് മുക്കുപണ്ടം ആയിരുന്നു. സംഭവത്തിൽ പ്രതിയെ പോലീസ് അറസ്റ്റ് ചെയ്തു. സംഭവം നടന്ന റോഡിന് എതിരെയുള്ള വീട്ടിലെ യുവാവായിരുന്നു പ്രതി. കൊറ്റട്ടാൽ മാതിരപ്പള്ളി വീട്ടിൽ ഷാജഹാൻ എന്ന 28 വയസ്സുകാരനാണ് അറസ്റ്റിൽ ആയിട്ടുള്ളത്. വൃദ്ധ പ്രതിയെ വ്യക്തമായി കാണാതിരുന്നതിനാൽ സംഭവശേഷം പ്രതിക്കായുള്ള തിരച്ചിലിലും ഇയാൾ പങ്കെടുത്തിരുന്നു.
അതിക്രമം നേരിട്ട ശേഷം വൃദ്ധ വിശ്രമിച്ചതും പ്രതിയുടെ വീട്ടിൽ ആയിരുന്നു. നാട്ടുകാർ പ്രതിയെ തിരയുന്ന സമയത്ത് ഇയാളും കൂടെ കൂടി. പോലീസ് സ്ഥലത്തെത്തി വിശദമായി ചോദ്യം ചെയ്തപ്പോഴാണ് ഷർട്ട് ഇടാതെ മുണ്ടു മാത്രം ധരിച്ച് ഒരാളാണ് മാല പൊട്ടിച്ചത് എന്ന് വൃദ്ധ വെളിപ്പെടുത്തിയത്. തുടർന്ന് സംശയം തോന്നിയ പോലീസ് ഷാജഹാന്റെ വീടിന് സമീപം തിരച്ചിൽ നടത്തിയപ്പോൾ പുറത്ത് സൂക്ഷിച്ചിരുന്ന ബക്കറ്റിൽ നിന്നും വൃദ്ധയുടെ മാല കണ്ടെത്തുകയായിരുന്നു. മാല സ്വർണം ആണെന്ന് തെറ്റിദ്ധരിച്ചാണ് ഇയാൾ വൃദ്ധയെ ഉപദ്രവിച്ച് മാല കവർന്നിരുന്നത്.
