എറണാകുളം: വാഹനാപകടത്തിൽ മകൾ മരിച്ചതിൽ മനംനൊന്ത് അമ്മ ജീവനൊടുക്കി. 45 വയസ്സുള്ള ഗായത്രി ആണ് മരിച്ചത്. ഗായത്രിയുടെ മകൾ സ്‌നേഹ വാഹനാപകടത്തിൽ പരിക്കേറ്റ് ചികിത്സയിലിരിക്കെ കഴിഞ്ഞ ശനിയാഴ്ചയായിരുന്നു മരിച്ചത്.
നെല്ലിക്കുഴി കമ്പനിപ്പടിയിലായിരുന്നു ഗായത്രിയുടെ താമസം. ഇവിടുത്തെ വീട്ടിൽ ഗായത്രിയെ തൂങ്ങിയ നിലയിൽ കാണുകയായിരുന്നു. ഉടനെ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാൻ സാധിച്ചില്ല. മഹാരാഷ്ട്ര സ്വദേശി ഹനുമന്ത് നായിക് ആണ് ഗായത്രിയുടെ ഭർത്താവ്. ഇയാൾ ജ്വല്ലറി ജീവനക്കാരനാണ്.
രണ്ട് മാസം മുൻപായിരുന്നു ചിറയിൻകീഴിൽവച്ചുണ്ടായ ബൈക്ക് അപകടത്തിൽ സ്‌നേഹയ്ക്ക് സാരമായി പരിക്കേറ്റത്. തുടർന്ന് തിരുവനന്തപുരം മെഡിക്കൽ കോളേജ് ആശുപത്രിയിൽ ചികിത്സയിലായിരുന്നു. ഇതിനിടെ ആരോഗ്യനില വഷളാകുകയും ഇതേ തുടർന്ന് സ്‌നേഹ മരിക്കുകയുമായിരുന്നു. പോസ്റ്റ്‌മോർട്ടം പൂർത്തിയാക്കി സ്‌നേഹയുടെ മൃതദേഹം മഹാരാഷ്ട്രയിലേക്ക് കൊണ്ടുപോകാൻ ഇരിക്കുകയായിരുന്നു. ഇതിനിടെയാണ് ഗായത്രിയുടെ ആത്മഹത്യ. രണ്ട് പേരുടെയും മൃതദേഹങ്ങൾ മഹാരാഷ്ട്രയിലേക്ക് കൊണ്ടുപോയി. സ്‌നേഹയുടെ സഹോദരൻ ശിവകുമാർ കമ്പ്യൂട്ടർ വിദ്യാർത്ഥിയാണ്.
