തൃശ്ശൂർ : തിരഞ്ഞെടുപ്പിന്റെ തലേദിവസം തൃശ്ശൂരിലെ കോൺഗ്രസ് ക്യാമ്പിനെ ഞെട്ടിക്കുന്ന ഒരു വാർത്തയാണ് പുറത്തുവന്നിരിക്കുന്നത്. തൃശ്ശൂരിലെ ഒരു പ്രമുഖ കോൺഗ്രസ് നേതാവ് കൂടി ബിജെപിയിലേക്ക് എത്തിയിരിക്കുകയാണ്. മൂന്ന് തവണ തൃശ്ശൂർ കോർപ്പറേഷൻ കൗൺസിലറായിരുന്ന ജോൺ കാഞ്ഞിരത്തിങ്കൽ ആണ് വ്യാഴാഴ്ച ബിജെപിയിൽ ചേർന്നത്.
ബിജെപി തൃശ്ശൂർ ജില്ലാ അധ്യക്ഷൻ അഡ്വ. കെ കെ അനീഷ് കുമാർ ജോൺ കാഞ്ഞിരത്തിങ്കലിനെ ബിജെപിയിലേക്ക് സ്വീകരിച്ചു. ബിജെപി സംസ്ഥാന സംഘടനാ ജനറൽ സെക്രട്ടറി കെ.സുഭാഷ് ,ജില്ലാ ജനറൽ സെക്രട്ടറി അഡ്വ കെ.ആർ ഹരി, ശ്രീ ശിവൻ എന്നിവരും ചടങ്ങിൽ സന്നിഹിതരായിരുന്നു.
ജോൺ കാഞ്ഞിരത്തിങ്കലിന്റെ വസതിയിൽ വച്ച് ബിജെപിയുടെ ഷാൾ അണിയിച്ചു കൊണ്ടാണ് അദ്ദേഹത്തെ ബിജെപി ജില്ലാ അധ്യക്ഷനും കൂട്ടരും ചേർന്ന് പാർട്ടിയിലേക്ക് വരവേറ്റത്. തൃശ്ശൂർ ജില്ലയിലെ ഏറ്റവും ജനകീയനായ കോൺഗ്രസ് നേതാവാണ് ജോൺ കാഞ്ഞിരത്തിങ്കൽ. തൃശ്ശൂരുമായി ബന്ധപ്പെട്ട നിരവധി സുപ്രധാന വിഷയങ്ങളിൽ ശ്രദ്ധേയമായ ഇടപെടലുകൾ നടത്തിയിട്ടുള്ള വ്യക്തിയാണ് അദ്ദേഹം. ഒല്ലൂർ മേഖലയിൽ കോൺഗ്രസ്സിന് കനത്ത പ്രഹരമാണ് ജോൺ കാഞ്ഞിരത്തിങ്കലിന്റെ ബിജെപി പ്രവേശനത്തിലൂടെ ഉണ്ടായിരിക്കുന്നത്.
Discussion about this post