മലയാളികൾക്ക് ഏറെ പ്രിയങ്കരിയായ താരമാണ് നവ്യനായർ. പ്രേക്ഷകർക്ക് നന്ദനം സിനിമയിലെ ആ ബാലാമണി തന്നെയാണ് നവ്യ ഇപ്പോഴും. സിനിമകൾക്ക് പുറമേ നൃത്തത്തിലും സജീവമായ താരം പല പരിപാടികളിലും വലുപ്പ ചെറുപ്പം നോക്കാതെ പങ്കെടുക്കാറുണ്ട്.
അത്തരത്തിൽ നവ്യ പങ്കെടുത്ത ഒരു പരിപാടിയിൽ നിന്നുള്ള ദൃശ്യങ്ങളാണ് സോഷ്യൽ മീഡിയയിൽ വൈറലാകുന്നത്. നവ്യക്ക് രണ്ട് മക്കൾ ഉണ്ടെന്ന് തരത്തിൽ ബുക്ക്ലെറ്റിൽ എഴുതിയ അധികൃതരോട് തന്റെ പരിഭവം പങ്കുവെച്ചുകൊണ്ട് സംസാരിക്കുകയാണ് നടി. ‘ഒരു പരിഭവമുണ്ട് നിങ്ങളോട് പറയാൻ. ഒരു ബുക്ക് ലെറ്റ് ഞാനിവിടെ കണ്ടു. അതിൽ എഴുതിയിരിക്കുന്നത് എനിക്ക് രണ്ട് മക്കൾ ഉണ്ടെന്നാണ്. എന്റെ മോൻ എന്തു വിചാരിക്കും? അങ്ങനെ ഇല്ലാട്ടോ. എന്റെ കുടുംബം എന്ത് വിചാരിക്കും? അവരൊന്നും അറിയാതെ എനിക്ക് യാമിക എന്നൊരു മകളുണ്ടെന്ന് അവർ ആ ബുക്ക്ലെറ്റിൽ എഴുതിയിരിക്കുന്നു. എന്നെപ്പറ്റി അറിയാത്തവർ അതല്ലേ മനസ്സിലാക്കുകയും അല്ലെങ്കിൽ വായിക്കുകയും ചെയ്യുക. എനിക്ക് ഒരു മകനെ ഉള്ളൂ എന്ന് കുറച്ചുപേർക്ക് അറിയാമായിരിക്കും. കുറച്ച് പേർക്ക് അറിയാം, അറിയാത്തവരും ഒരുപാടുണ്ടാകില്ലേ. ദയവുചെയ്ത് ഇത്തരം കാര്യങ്ങൾ ഊഹിച്ചെഴുതരുത്. വളരെ എളുപ്പത്തിൽ വിക്കിപീഡിയയിൽ നോക്കിയാൽ അറിയാം. അത്രയും സിംപിളായിട്ട് നോക്കി എഴുതാവുന്നതേ ഉണ്ടായിരുന്നുള്ളു. അങ്ങനൊരു പരിഭവം മാത്രം നിങ്ങളോട് പറയുന്നു. പിന്നെ വേറൊരു സന്തോഷമുള്ള കാര്യം ഞാൻ അഭിനയിക്കാത്ത കുറച്ച് സിനിമകളുടെ ലിസ്റ്റ് കൂടി അതിൽ എഴുതി ചേർത്തിട്ടുണ്ട്. വേറെ ആരോ ചെയ്ത സിനിമയുടെ ക്രെഡിറ്റും എനിക്ക് കിട്ടി. അതെനിക്ക് കുഴപ്പമില്ല. ഞാനത് അഡ്ജസ്റ്റ് ചെയ്തോളം. അങ്ങനെ സിനിമകൾ ചെയ്തുവെന്ന് പറയുന്നത് ഞാൻ നല്ല സ്പിരിറ്റിൽ എടുക്കും.പക്ഷേ കുട്ടിയുടെ കാര്യത്തിൽ അവകാശം ഏറ്റെടുക്കാൻ പറ്റില്ല. എനിക്കില്ലാത്ത കുട്ടിയായതു കൊണ്ടാണ്. താൻ തമാശപോലെ പറഞ്ഞെന്നേയുള്ളു. എന്നിരുന്നാലും എന്നെ ഇവിടെ വിളിച്ചതിൽ അതിയായ സന്തോഷമുണ്ടെന്നും’ നവ്യ നായർ പറയുന്നു.
