ഒരിക്കൽ നാം കൗതുകത്തോടെ കണ്ടിരുന്ന,അറിഞ്ഞിരുന്ന ജീവികളിലേതെങ്കിലും ഈ ഭൂലോകത്ത് നിന്ന് അപ്രത്യക്ഷമാകുന്ന അവസ്ഥ ഒന്നാലോചിച്ച് നോക്കൂ. ഭക്ഷ്യശൃംഖലയെ തന്നെ തകിടം മറിച്ച് ഭൂമിയുടെ നിലനിൽപ്പിനെ തന്നെ ബാധിക്കും അല്ലേ…അതായത് വരും തലമുറയുടെ നിലനിൽപ്പിനായി ഇന്ന് നമ്മുടെ ലോകത്തുള്ള ജീവികളെ സംരക്ഷിച്ചേ മതിയാകൂ… അത്തരമൊരു ഉദ്യമത്തിലാണ് കഴിഞ്ഞ കുറച്ചുനാളുകളായി ഭാരതസർക്കാർ. ആഫ്രിക്കൻ രാജ്യങ്ങളിൽ നിന്നും ചീറ്റപ്പുലികളെ ഇന്ത്യയിൽ എത്തിച്ച് വളർത്തുന്നതും അവയുടെ വംശമറ്റ് പോകാതിരിക്കാൻ തന്നെ.
ഇപ്പോഴിതാ ഇന്ത്യയിൽ നിന്നും കടുവകളെ കംബോഡിയയിലേക്ക് അയക്കാനുള്ള തീരുമാനമായിരിക്കുകയാണെന്നാണ് റിപ്പോർട്ടുകൾ. നവംബറിലോ ഡിസംബറിലോ നാല് കടുവകളെ കംബോഡിയയിലേക്ക് അയക്കുമെന്നാണ് ദേശീയമാദ്ധ്യമങ്ങൾ റിപ്പോർട്ട് ചെയ്യുന്നത്.
2022ൽ ലോകത്തിലെ ആദ്യത്തെ അന്തർദേശീയ കടുവ പുനരുദ്ധാരണ പദ്ധതിക്കായി കംബോഡിയയുമായി കരാർ ഒപ്പിട്ടിരുന്നു. കംബോഡിയയിൽ നിന്നുള്ള ഉദ്യോഗസ്ഥർ, നാഷണൽ ടൈഗർ കൺസർവേഷൻ അതോറിറ്റി, കംബോഡിയയിലെ ഇന്ത്യൻ അംബാസഡർ ദേവയാനി ഖോബ്രഗഡെ എന്നിവർ ഓൺലൈൻ മീറ്റിംഗിൽ പങ്കെടുക്കുകയും നവംബർ-ഡിസംബർ മാസങ്ങളിൽ കംബോഡിയയിലേക്ക് നാല് കടുവകളെ അയക്കാനുള്ള നിർദ്ദേശം ചർച്ച ചെയ്യുകയും ചെയ്തു. എന്നാൽ ഇക്കാര്യത്തിൽ അന്തിമ തീരുമാനം കാത്തിരിക്കുകയാണെന്നാണ് വിവരങ്ങൾ. കോർബറ്റ് ദേശീയോദ്യാനത്തിൽ നിന്നും കടുവകളെ കംബോഡിയയിലേക്ക് അയക്കാനാണ് ആലോചിക്കുന്നത്. കംബോഡിയയിൽ കടുവകളുടെ വംശനാശത്തിന് കാരണമായ ഘടകങ്ങൾ ഇപ്പോഴും നിലവിലുണ്ടോ എന്നും അത് പരിഹരിച്ചോ എന്നും പരിശോധിച്ച ശേഷമേ അവയെ കൈമാറാൻ ഇടയുള്ളു എന്നാണ് സൂചനകൾ.
ലോകത്തിൽ വംശനാശഭീഷണി നേരിടുന്ന മൃഗമാണ് കടുവ. അപകടകാരിയായ മൃഗമായതിനാൽ ഇതിനെ വേട്ടയാടുന്ന ആളുകളെ സമൂഹം വീരന്മാരായാണ് കണ്ടിരുന്നത്. കടുവയുടെ ശരീര വംശനാശഭീഷണി നേരിടുന്ന മൃഗം എന്നതിനാൽ ഈ കടുവകൈമാറ്റം ഏറെ പ്രത്യേകതകളുള്ളതാണ്. കടുവ അലറിയാൽ കാട് വളരും എന്ന ചൊല്ലുതന്നെയുണ്ട്. അതായത് കടുവകളുള്ള കാട് മികച്ച പരിസ്ഥിതി സന്തുലനം ഉള്ള പ്രദേശമായിരിക്കും. കാട്ടിൽ ആരോഗ്യമുള്ള കടുവകൾ ഉണ്ടാകണമെങ്കിൽ, അവിടെ പുല്ല് തിന്നുന്ന ജീവികൾ ധാരാളമായി ഉണ്ടാകണം. എങ്കിലേ കടുവകൾക്ക് ആവശ്യത്തിന് ഇര ലഭിക്കൂ. മാൻ പോലുള്ള സസ്യഭുക്കുകൾ ഉണ്ടാകണമെങ്കിൽ ധാരാളം പച്ചപ്പ് വേണം. പച്ചപ്പുണ്ടാകണമെങ്കിൽ അനുയോജ്യമായ കാലാവസ്ഥ വേണം. കാടിന്റെ സമ്പൂർണ ആരോഗ്യം കാത്തുസൂക്ഷിക്കുന്നതിന് കടുവകൾ കാരണമാകുന്നത് ഇതുകൊണ്ടാണ്.ധാരാളം കടുവകളുള്ള കാട് നശിക്കില്ല. ഭക്ഷണ ശ്രേണിയിലെ ഏറ്റവും മുകളിലുള്ള കടുവയുടെ അഭാവം താഴോട്ടുള്ള ഓരോ ശൃംഖലയേയും ബാധിക്കും. കാട്ടിൽ സസ്യാഹാരം തിന്നു വളരുന്ന ജീവികൾ പെറ്റുപെരുകിയാൽ, കാട്ടിലേ സസ്യലതാദികൾ മുഴുവൻ തിന്നു തീർക്കും. സസ്യങ്ങൾ ഇല്ലാതാകുന്നതോടെ കാട് വരൾച്ച ബാധിച്ച് നശിക്കും. കാട് ഇല്ലാതാകുന്നതോടെ ജല ലഭ്യത കുറഞ്ഞ് ആ പ്രദേശം വരണ്ടുണങ്ങും. ആവാസ വ്യവസ്ഥ തകിടം മറിയും. അതായത് ലോകത്തിന്റെ നിലനിൽപ്പിന് ആധാരമായ ഒരു പ്രവൃത്തിയ്ക്കാണ് ഇന്ത്യ പങ്കാളിയാവുന്നതെന്ന് അഭിമാനത്തോടെ നമുക്ക് മനസിലാക്കാം.
