ന്യൂഡൽഹി : ലോക്സഭാ തെരഞ്ഞെടുപ്പിൽ ഡൽഹി മുഖ്യമന്ത്രിയും ആം ആദ്മി പാർട്ടി നേതാവുമായ അരവിന്ദ് കെജ്രിവാളിന് ആശംസകൾ അറിയിച്ച് മുൻ പാകിസ്താൻ മന്ത്രി. അരവിന്ദ് കെജ്രിവാൾ കുടുംബത്തോടൊപ്പം വോട്ട് ചെയ്തതിനു ശേഷം പങ്കുവെച്ച ചിത്രത്തിനാണ് മുൻ പാകിസ്താൻ മന്ത്രിയായ ചൗധരി ഫവാദ് ഹുസൈൻ
ആശംസകൾ അറിയിച്ചത്.
സ്നേഹവും സമാധാനവും കൊണ്ട്
വിദ്വേഷത്തിന്റെയും തീവ്രവാദത്തിന്റെയും ശക്തികളെ പരാജയപ്പെടുത്താൻ കഴിയട്ടെ എന്നായിരുന്നു ചൗധരി ഫവാദ് ഹുസൈൻ അറിയിച്ചത്. പാകിസ്താൻ തെഹ്‌രീകെ ഇൻസാഫ് നേതാവും മുൻ മന്ത്രിയുമാണ് ചൗധരി ഫവാദ് ഹുസൈൻ. സ്വേച്ഛാധിപത്യത്തിനും തൊഴിലില്ലായ്മയ്ക്കും വിലക്കയറ്റത്തിനും എതിരെ ഞാൻ വോട്ട് ചെയ്തു എന്ന കുറിപ്പോടെ അരവിന്ദ് കെജ്രിവാൾ പങ്കുവെച്ച ചിത്രത്തിൽ ആയിരുന്നു പാക് മന്ത്രി അഭിപ്രായം പങ്കുവെച്ചത്.
“എനിക്കും എൻ്റെ രാജ്യത്തെ ജനങ്ങൾക്കും ഞങ്ങളുടെ പ്രശ്‌നങ്ങൾ കൈകാര്യം ചെയ്യാൻ പൂർണ്ണ ശേഷിയുണ്ട്” എന്നായിരുന്നു പാക് മുൻ മന്ത്രിയുടെ കമന്റിനുള്ള കെജ്രിവാളിന്റെ പ്രതികരണം. വിഷയത്തിൽ കുറ്റപ്പെടുത്തലും ആയി ബിജെപി മുന്നോട്ടുവന്നതിനെ തുടർന്നാണ് കെജ്രിവാൾ പാക് മുൻ മന്ത്രിക്ക് മറുപടി നൽകിയത്. പാകിസ്താനിൽ നിന്നും നേരിട്ട് അഭ്യർത്ഥിച്ചിട്ടും ആം ആദ്മിയുടെ ബൂത്ത് കൗണ്ടറുകളിൽ പോലും ആളില്ല എന്നായിരുന്നു ബിജെപി ഈ വിഷയത്തിൽ പ്രതികരിച്ചത്.
