ആഗോളതലത്തിൽ ട്രാവൽ & ടൂറിസം മേഖലയിൽ വമ്പൻ പുരോഗതിയുമായി കുതിക്കുകയാണ് ഭാരതം. കഴിഞ്ഞ നാല് വർഷങ്ങൾ കൊണ്ട് ട്രാവൽ & ടൂറിസം പുരോഗതിയിലെ ആഗോള റാങ്കിങ്ങിൽ 54ആം സ്ഥാനത്തു നിന്നും 39ആം സ്ഥാനത്തേക്കാണ് ഇന്ത്യ എത്തിയിരിക്കുന്നത്. വേൾഡ് ഇക്കണോമിക് ഫോറത്തിന്റെ 2024ലെ ട്രാവൽ & ടൂറിസം ഡെവലപ്മെന്റ് ഇൻഡക്സ് വാർഷിക റിപ്പോർട്ടിലാണ് ഇന്ത്യയുടെ ഈ വൻ പുരോഗതിയെക്കുറിച്ച് സൂചിപ്പിച്ചിരിക്കുന്നത്.
റിപ്പോർട്ട് അനുസരിച്ച് ദേശീയ അന്തർദേശീയ വിനോദസഞ്ചാര മേഖലയിൽ ആഗോളതലത്തിൽ 39 ആം സ്ഥാനത്തും ദക്ഷിണേഷ്യയിൽ ഒന്നാം സ്ഥാനത്തുമാണ് ഇന്ത്യ ഉള്ളത്. ടൂറിസം ഇൻഫ്രാസ്ട്രക്ച്ചറിലെ നിക്ഷേപത്തിൽ രാജ്യം വലിയ വർദ്ധനവ് വരുത്തിയത് മേഖലയിലെ പുരോഗതിയുടെ ഒരു അടിസ്ഥാന കാരണമായി കണക്കാക്കപ്പെടുന്നു. അന്തർദേശീയ ടൂറിസം ഭൂപടത്തിൽ ഇന്ത്യയുടെ സമ്പന്നമായ സാംസ്കാരിക പൈതൃകം ആണ് ഏറ്റവും ആകർഷണീയമായ ഘടകം. ലോകമെമ്പാടുമുള്ള സഞ്ചാരികളെ ഇന്ത്യയിലേക്ക് ആകർഷിക്കുന്നതും നമ്മുടെ നാടിന്റെ ഈ സമ്പന്നമായ പൈതൃകമാണ്. എന്നാൽ അതോടൊപ്പം അടിസ്ഥാന സൗകര്യങ്ങളിൽ കൂടി വലിയ വികസനങ്ങൾ സാധ്യമായതോടെ ഇന്ത്യയിലേക്കുള്ള അന്താരാഷ്ട്ര വിനോദസഞ്ചാരികളുടെ വരവിന്റെ എണ്ണത്തിലും വലിയ വർദ്ധനവാണ് ഉണ്ടായിട്ടുള്ളത്.
വേൾഡ് ഇക്കണോമിക് ഫോറത്തിന്റെ റിപ്പോർട്ട് അനുസരിച്ച് ട്രാവൽ & ടൂറിസം മേഖലയിൽ യുഎസ്, സ്പെയിൻ, ജപ്പാൻ, ഫ്രാൻസ്, ഓസ്ട്രേലിയ, ജർമ്മനി, യു കെ, ചൈന, ഇറ്റലി, സ്വിറ്റ്സർലാൻഡ് എന്നിവയാണ് ആദ്യ 10 സ്ഥാനങ്ങളിൽ ഉള്ളത്. 2021ൽ ആയിരുന്നു മുൻപ് വേൾഡ് ഇക്കണോമിക് ഫോറം വിനോദസഞ്ചാര പുരോഗതിയുമായി ബന്ധപ്പെട്ട റിപ്പോർട്ട് പുറത്തിറക്കിയിരുന്നത്. കൊവിഡ് മഹാമാരിക്കും റഷ്യ-യുക്രൈൻ യുദ്ധം ആഗോളതലത്തിൽ ഉണ്ടാക്കിയ സാമ്പത്തിക പ്രത്യാഘാതങ്ങൾക്കും ശേഷം വീണ്ടും ട്രാവൽ & ടൂറിസം മേഖല ഉയർച്ച പ്രാപിക്കുകയാണ് എന്നാണ് നിലവിലെ റിപ്പോർട്ടുകൾ സൂചിപ്പിക്കുന്നത്.
ട്രാവൽ & ടൂറിസം മേഖലയിൽ ഇന്ത്യയിൽ കഴിഞ്ഞ ഏതാനും വർഷങ്ങളിൽ ഉണ്ടായ ശ്രദ്ധേയമായ ഒരു മാറ്റം ഡിജിറ്റൽ പ്ലാറ്റ്ഫോമുകളുടെയും ഓൺലൈൻ ബുക്കിംഗ് സേവനങ്ങളുടെയും വലിയ തോതിലുള്ള ഉയർച്ചയാണ്. അന്താരാഷ്ട്ര ടൂറിസ്റ്റുകളെ കൂടുതലായി ആകർഷിക്കാൻ സൗകര്യപ്രദമായ ഈ ഡിജിറ്റൽ ഓൺലൈൻ സേവനങ്ങൾക്ക് കഴിയുന്നുണ്ട്. കൂടാതെ മുൻകാലങ്ങളെ അപേക്ഷിച്ച് പ്രകൃതി, പൈതൃകം എന്നീ മേഖലകളിൽ മാത്രം ഒതുങ്ങി കൂടാതെ ഇന്ത്യൻ ടൂറിസം മേഖല സാഹസിക വിനോദസഞ്ചാരങ്ങൾക്കും ആയുർവേദം, യോഗ എന്നിവ പോലുള്ള വെൽനസ് റിട്രീറ്റുകൾക്കും കൂടുതൽ പ്രാധാന്യം നൽകുന്നത് അന്തർദേശീയ തലത്തിൽ കൂടുതൽ സഞ്ചാരികളെ ഇന്ത്യയിലേക്ക് ആകർഷിക്കുന്നുണ്ട്. പ്രാദേശിക മേഖലകളിൽ വികസിച്ചുവരുന്ന എയർ, റോഡ്, റെയിൽ ശൃംഖലകൾ വഴിയുള്ള മികച്ച കണക്ടിവിറ്റി ഇന്ത്യയിലെ കൂടുതൽ സ്ഥലങ്ങളിൽ പര്യവേഷണം നടത്താനും സഞ്ചാരികളെ പ്രേരിപ്പിക്കുന്നുണ്ട്. ഓരോ വർഷവും ഇന്ത്യയിൽ ഉണ്ടായിക്കൊണ്ടിരിക്കുന്ന അടിസ്ഥാന സൗകര്യങ്ങളുടെ വർദ്ധനവ് ട്രാവൽ & ടൂറിസം മേഖലയിൽ വരുംവർഷങ്ങളിലും കൂടുതൽ വളർച്ച പ്രാപിക്കാൻ ഇന്ത്യയെ സഹായിക്കും എന്നുള്ള കാര്യം തീർച്ചയാണ്.
