ന്യൂഡൽഹി: ഡൽഹിയിലെ ഇന്ദിരാഗാന്ധി അന്താരാഷ്ട്ര വിമാനത്താവളത്തിൽ നിന്നുള്ള വിമാനത്തിൽ ബോംബ് വച്ചതായി സന്ദേശം. ഇതേ തുടർന്ന് വിമാനത്തിൽ ബോംബ് സ്‌ക്വാഡും പോലീസും പരിശോധന നടത്തി. രാവിലെയോടെയായിരുന്നു സംഭവം.
ഡൽഹിയിൽ നിന്നും ദുബായിലേക്ക് പുറപ്പെടാനിരുന്ന വിമാനത്തിലാണ് ബോംബ് വച്ചിട്ടുള്ളതായി സന്ദേശം ലഭിച്ചത്. വിമാനത്താവളത്തിന്റെ ഔദ്യോഗിക ഇ മെയിൽ വിലാസത്തിലേക്ക് ഭീഷണി സന്ദേശം എത്തുകയായിരുന്നു. ഉടനെ ജീവനക്കാർ വിവരം പോലീസിനെയും സുരക്ഷാ ഉദ്യോഗസ്ഥരെയും അറിയിച്ചു.
പരിശോധനയിൽ സംശയാസ്പദമായ സാഹചര്യത്തിൽ ഒന്നും കണ്ടെത്താൻ കഴിഞ്ഞില്ല. സന്ദേശം വ്യാജമാണെന്നാണ് പോലീസിന്റെ നിഗമനം. സംഭവത്തിൽ വിശദമായ അന്വേഷണം ആരംഭിച്ചു. സന്ദേശം എത്തിയ ഇ മെയിൽ വിലാസം കേന്ദ്രീകരിച്ചാണ് അന്വേഷണം.
അടുത്തിടെയായി വിമാനങ്ങളിലും വിമാനത്താവളത്തിലും ബോംബ് വച്ചതായുള്ള ഭീഷണി സന്ദേശങ്ങൾ എത്തുന്നത് പതിവായിരിക്കുകയാണ്. കഴിഞ്ഞ മാസം ഡൽഹിയിൽ നിന്നും കാനഡയിലേക്കുള്ള വിമാനത്തിലും ഭീഷണി സന്ദേശം ലഭിച്ചിരുന്നു. നിരന്തരമായി ഭീഷണി സന്ദേശങ്ങൾ എത്തുന്ന പശ്ചാത്തലത്തിൽ വലിയ ഭീതിയിലാണ് യാത്രികർ.
