എറണാകുളം: ലഹരി പാർട്ടി നടത്തിയെന്ന ഗായിക സുചിത്രയുടെ ആരോപണങ്ങളിൽ പ്രതികരിച്ച് സംവിധായകൻ ആഷിക് അബു. അന്വേഷണത്തിനെ സ്വാഗതം ചെയ്യുന്നുവെന്ന് ആഷിഖ് അബു പറഞ്ഞു. ഇതിന് മുമ്പും അടിസ്ഥാന രഹിതമായ ആരോപണണങ്ങൾ തനിക്കെതിരെയും മറ്റ് പലർക്കെതിരെയും ഉണ്ടായിട്ടുണ്ട്. മുസ്ലിം നാമധാരികളായ ആളുകൾക്കെതിരെ സംഘപരിവാർ വർഷങ്ങളായി നടത്തിക്കൊണ്ടിരിക്കുന്ന ആക്രമണണിതെന്നും ആഷിഖ് അബു പറഞ്ഞു.
സിനിമാ സെറ്റുകളിലെ ലഹരി ഉപയോഗം ഉണ്ടെന്ന ആരോപണത്തിൽ അന്വേഷണം നടക്കട്ടെ. പരാതി ഉണ്ടെങ്കിൽ കൊടുക്കാതെ സമൂഹമാധ്യമങ്ങളിൽ പോസ്റ്റ് ഇടുകയല്ല വേണ്ടത്. ആരോപണത്തിന് പിന്നിലുള്ള ഉദ്ദേശ്യം എന്താണെന്ന് അറിയില്ല. തങ്ങളുടെ സിനിമ സെറ്റുകളിൽ സിനിമയല്ലാതെ മറ്റൊന്നും നടക്കാറില്ല. ആർക്കെങ്കിലും ഇങ്ങനെയൊരു സംശയം ഉണ്ടെങ്കിൽ എല്ലാ സെറ്റുകളിലും പരിശോധന നടക്കട്ടെ. നിയമപരമായ നടപടികൾ തങ്ങൾ തുടരുമെന്നും ആഷിഖ് അബു വ്യക്തമാക്കി.
ബലാത്സംഗ ആരോപണങ്ങളെ നിവിൻ പോളി ആർജവത്തോടെ നേരിട്ടുവെന്നും ആഷിഖ് അബു പറഞ്ഞു. പിണറായി വിജയൻ മമ്മൂട്ടിയും മോഹൻലാലുമായി ചേർന്ന് ഫഹദ് ഫാസിലിന്റെ കരിയർ തകർക്കാൻ വേണ്ടിയാണ് ഹേമ കമ്മിറ്റി രൂപീകരിച്ചതെന്ന് പോലും പറഞ്ഞവരാണ് സുചിത്ര. ഒരുപാട് ആരോപണങ്ങൾ പറയുന്ന വ്യക്തിയാണ് അവർ. സുചിത്രയ്ക്ക് മാനസീകമായി സഹായം വേണ്ട അവസ്ഥയാണെന്നും അദ്ദേഹം കൂട്ടിച്ചേർത്തു.
