തിരുവനന്തപുരം: സംസ്ഥാനത്തെ പെട്രോൾ പമ്പുകളിൽ ഇന്ധനത്തിന്റെ അളവിൽ വ്യാപക ക്രമക്കേടെന്ന് വിവരം. സർക്കാരിന്റെ സിവിൽ സപ്ലൈസ് പമ്പുകളിൽ അടക്കം വിൽക്കുന്ന ഇന്ധനത്തിന്റെ അളവിൽ വ്യാപക ക്രമക്കേടെന്നാണ് വിവരം. അളവുതൂക്ക പരിശോധനാ വിഭാഗത്തിന്റെ കണ്ടെത്തൽ. 50 പമ്പുകളിലാണ് ഇന്ധനത്തിന്റെ അളവ് അനുവദനീയമായതിലും കുറവാണെന്നു പരിശോധനയിൽ കണ്ടെത്തിയത്.
ക്രമക്കേട് കണ്ടെത്തിയ പമ്പുകൾക്ക് 9.69 ലക്ഷം രൂപ പിഴ ചുമത്തി. പാലക്കാട് (61), എറണാകുളം (55) തിരുവനന്തപുരം (53) ജില്ലകളിലാണ് നിയമലംഘന കേസുകൾ കൂടുതൽ. കുറവ് വയനാട്ടിലും (15). രണ്ടര വർഷത്തിനിടെ നടത്തിയ പരിശോധനയിലാണ് ക്രമക്കേട് കണ്ടെത്തിയതെന്ന് വിവരാവകാശ അപേക്ഷയ്ക്ക് മറുപടിയായി അധികൃതർ വെളിപ്പെടുത്തി
5 ലിറ്റർ ഇന്ധനം വിൽക്കുമ്പോൾ അതിൽ 25 മില്ലിലീറ്റർ കൂടുകയോ കുറയുകയോ ചെയ്യുന്നതിൽ പിഴവില്ലെന്നാണു നിയമത്തിലെ ഇളവ്. എന്നാൽ, ചില പമ്പുകളിൽ 100 മുതൽ 120 മില്ലിലീറ്റർ വരെ വ്യത്യാസമാണ് കണ്ടെത്തിയത്. നോസിൽ സീൽ ചെയ്യുമ്പോൾ തന്നെ 5 ലീറ്ററിന് 25 മില്ലിലീറ്റർ കുറച്ചുവയ്ക്കും. അപ്പോൾ 2 ലീറ്റർ ഇന്ധനം അടിക്കുന്നവർക്ക് 10 മില്ലിലീറ്റർ കുറയും.
ഇന്ധനം നിറയ്ക്കുമ്പോൾ നോസിലിൽ തുടർച്ചയായി പ്രസ് ചെയ്ത് അളവിൽ ക്രമക്കേട് നടത്തുന്നുവെന്നും വിവരമുണ്ട്. തുടർച്ചയായി പ്രസ് ചെയ്യുമ്പോൾ നോസിലിൽ വായു കയറി ടാങ്കിൽ വീഴുന്ന ഇന്ധനത്തിന്റെ അളവ് കുറയും. ഇത് തടയാൻ നോസിൽ ടാങ്കിൽ വച്ചാലുടൻ ലോക്ക് ചെയ്തു പമ്പ് ജീവനക്കാരോട് കയ്യെടുക്കാൻ ആവശ്യപ്പെടണം. ഇന്ധനം നിറച്ചയുടൻ നോസിൽ എടുത്തു മാറ്റാനും അനുവദിക്കരുത്.
പെട്രോൾ പമ്പുകളിൽ എല്ലാ ദിവസവും രാവിലെ ഇന്ധനം പ്രത്യേക അളവ് പാത്രങ്ങളിൽ ശേഖരിച്ച് അളവ് കൃത്യമാണെന്ന് ഉറപ്പുവരുത്തണമെന്നാണ് ചട്ടം. എന്നാൽ മിക്ക പമ്പ് ഉടമകളും ഇവ പാലിക്കാറില്ലെന്ന് ലീഗൽ മെട്രോളജി അധികൃതർ പറഞ്ഞു. ഉപഭോക്താക്കൾ ഇന്ധനത്തിന്റെ അളവിൽ സംശയം പ്രകടിപ്പിച്ചാൽ പരിശോധിച്ച് ഉറപ്പുവരുത്താനുള്ള സംവിധാനം പമ്പുകളിൽ ലഭ്യമാക്കേണ്ടതാണ്. ഇതും പലയിടത്തും നടക്കാറില്ല. അഥവാ നമുക്ക് അളവിൽ സംശയം തോന്നിയാൽ അളവ് പാത്രത്തിൽ നിറച്ച് സംശയം തീർത്ത് നൽകാൻ ആവശ്യപ്പെടാം
