മലപ്പുറം: മലപ്പുറത്ത് ഏഴ് പേർക്ക് നിപ രോഗ ലക്ഷണങ്ങൾ കണ്ടെത്തിയതായി ആരോഗ്യമന്ത്രി വീണ ജോർജ്. നിപ രോഗം സ്ഥിരീകിരിച്ച യുവാവിന്റെ സമ്പർക്കപട്ടികയിൽ 267 പേരാണുള്ളത്. ഇതിൽ പരിശോധിച്ച 37 സാമ്പിളുകൾ നെഗറ്റീവ് ആണെന്നും ആരോഗ്യമന്ത്രി വ്യക്തമാക്കി.
മറ്റുള്ളവരുടെ സാമ്പിളുകൾ ഉടൻ തന്നെ പരിശോധിക്കും. ജനങ്ങൾ അതീവ ജാഗ്രത പാലിക്കണമെന്നും മന്ത്രി വ്യക്തമാക്കി. മലപ്പുറത്ത് വിദേശത്ത് നിന്നെത്തിയ 38കാരനും ഇന്നലെ എംപോക്‌സ് സ്ഥരീകരിച്ചിരുന്നു. ഈ സാഹചര്യത്തിൽ സംസ്ഥാനത്തുടനീളം പരിശോധനയും ജാഗ്രതയും കർശനമാക്കിയിട്ടുണ്ട്. എംപോകീസ് ബാധിച്ചയാളുടെ സമ്പർക്ക പട്ടികയിൽ 23 പേരാണ് ഉള്ളത്. ഇവരുടെ സാമ്പിളുകളും പരിശോധനക്ക് അയക്കും.
ദുബായിയിൽ നിന്നുമാണ് യുവാവ് എത്തിയത്. വിമാനത്തിൽ ഇയാളുടെ മുന്നിലും പിന്നിലുമായ 3 വരികളിലുള്ള 43 പേരെ തിരിച്ചറിഞ്ഞതായും മന്ത്രി അറിയിച്ചു. ഇവരെയും കണ്ടെത്തും. സമ്പർക്കപട്ടികയിലുള്ളവരോട് വീട്ടിൽ തന്നെ കഴിയാൻ നിർദേശം നൽകിയിട്ടുണ്ട്. ചികിത്സയിൽ കഴിയുന്ന യുവാവിന്റെ ആരോഗ്യ നില തൃപ്തികരമാണ്. ഇദ്ദേഹത്തിന്റെ റൂട്ട് മാപ്പ് വൈകാതെ പുറത്തുവിടുമെന്നും ആരോഗ്യമന്ത്രി അറിയിച്ചു.
