നാഗ്പൂർ: ബംഗ്ലാദേശിലെ സമീപകാലസംഭവങ്ങൾ ഇന്ത്യയിലെ ഹിന്ദുക്കൾക്ക് പാഠമാണെന്ന് മുന്നറിയിപ്പ് നൽകി ആർഎസ്എസ് സർസംഘ്ചാലക് മോഹൻ ഭാഗവത്. നാഗ്പൂരിലെ വിജയദശമി പരിപാടിയിൽ പങ്കെടുത്ത് സംസാരിക്കുകയായിരുന്നു അദ്ദേഹം. ഹിന്ദുക്കൾക്കിടയിൽ ഐക്യത്തിന് ആഹ്വാനം ചെയ്ത അദ്ദേഹം,ബംഗ്ലാദേശിലെ ഹിന്ദുക്കൾക്കെതിരായ അതിക്രമങ്ങളെ അപലപിക്കുകയും ന്യൂനപക്ഷങ്ങളെ സംരക്ഷിക്കുന്നതിൽ കൂടുതൽ സജീവമായ പങ്ക് വഹിക്കാൻ ഇന്ത്യൻ സർക്കാരിനോട് അഭ്യർത്ഥിക്കുകയും ചെയ്തു.
‘നമ്മുടെ അയൽരാജ്യമായ ബംഗ്ലാദേശിൽ എന്താണ് സംഭവിച്ചത്? ഇതിന് ചില കാരണങ്ങളുണ്ടാകാം, പക്ഷേ അടിസ്ഥാന വിഷയം ഹിന്ദുക്കൾക്കെതിരായ ആവർത്തിച്ചുള്ള അതിക്രമങ്ങളാണെന്ന് അദ്ദേഹം പറഞ്ഞു. ആദ്യമായി, സ്വയം സംരക്ഷിക്കാൻ ഹിന്ദുക്കൾ ഒന്നിക്കണം എന്നാൽ ഈ സമൂലമായ അക്രമം നിലനിൽക്കുന്നിടത്തോളം കാലം, ഹിന്ദുക്കൾ മാത്രമല്ല, എല്ലാ ന്യൂനപക്ഷങ്ങളും അപകടത്തിലാണ്. അവർക്ക് ലോകമെമ്പാടുമുള്ള ഹിന്ദുക്കളുടെ പിന്തുണ ആവശ്യമാണ്, ഇന്ത്യൻ സർക്കാർ ഇടപെടണമെന്ന് ആർഎസ്എസ് മേധാവി പറഞ്ഞു
ബംഗ്ലാദേശിൽ ഇന്ത്യ വിരുദ്ധ വികാരം വർദ്ധിക്കുന്നതിനെതിരെയും അദ്ദേഹം മുന്നറിയിപ്പ് നൽകി, ഇന്ത്യയെ ഒരു ഭീഷണിയായി കണ്ട്, ആണവ ശേഷിയുടെ പേരിൽ രാജ്യം പാകിസ്താനുമായി യോജിച്ച് പോകണമെന്ന് നിർദ്ദേശിക്കുന്ന ചർച്ചകൾ നടക്കുന്നതായി റിപ്പോർട്ടുണ്ട്. രൂപീകരിക്കപ്പെട്ട സമയത്ത് പൂർണ്ണ പിന്തുണ ലഭിച്ച രാജ്യം ഇപ്പോൾ ഭാരതത്തിനെതിരായ ഇത്തരമൊരു നീക്കത്തെ പ്രോത്സാഹിപ്പിക്കുകയാണെന്ന് അദ്ദേഹം കുറ്റപ്പെടുത്തി
