ലക്‌നൗ: ഉത്തർപ്രദേശിൽ ട്രാൻസ്‌ഫോർമർ മോഷ്ടിക്കുന്നതിനിടെ പരിക്കേറ്റ മോഷ്ടാവിനെ ഗംഗാ നദിയിലേക്ക് എറിഞ്ഞ് കൂട്ടാളികൾ. കാൻപൂരിലെ കേണൽഗഞ്ജിലായിരുന്നു സംഭവം. 22 കാരനായ ഹിമാൻഷുവിനാണ് ഷോക്കേറ്റത്. സംഭവത്തിൽ ഇയാളുടെയും കൂട്ടാളികളായ ഷാൻ അലി, അസ്ലം, വിശാൽ, രവി എന്നിവരുടെയും അറസ്റ്റ് പോലീസ് രേഖപ്പെടുത്തിയിട്ടുണ്ട്.
കഴിഞ്ഞ മാസം 26 നായിരുന്നു സംഭവം എന്നാണ് വിവരം. ഗുരുദേവ് പാലസ് ഇന്റർസെക്ഷനിലെ ട്രാൻസ്‌ഫോർമർ മോഷ്ടിച്ച് വിൽക്കാൻ ആയിരുന്നു അഞ്ചംഗ സംഘത്തിന്റെ പദ്ധതി. എന്നാൽ ട്രാൻസ്‌ഫോർമർ എടുക്കാനുള്ള ശ്രമത്തിനിടെ ഹിമാൻഷുവിന്റെ ശരീരത്തിൽ സമീപത്തെ കേബിൾ സ്പർശിച്ചു. ഇതോടെ ഹിമാൻഷു ഷോക്കേറ്റ് തെറിച്ച് വീഴുകയായിരുന്നു. പരിഭ്രാന്തരായ കൂട്ടാളികൾ യുവാവിന്റെ കൈകാലുകൾ ബന്ധിച്ച് ഗംഗാ നദിയിൽ എറിയുകയായിരുന്നു.
പുറത്ത് പോയ ഹിമാൻഷു തിരികെ എത്താതിരുന്നതോടെ അമ്മ പരാതിയുമായി പോലീസിനെ സമീപിച്ചു. ഇതോടെ അന്വേഷണം ആരംഭിച്ച പോലീസ് നാല് പേരെയും കസ്റ്റഡിയിൽ എടുക്കുകയായിരുന്നു. ഇവരെ ചോദ്യം ചെയ്തതിൽ നിന്നാണ് ഹിമാൻഷുവിനെ നദിയിൽ എറിഞ്ഞ കാര്യം വ്യക്തമായത്. പോലീസ് ഇക്കാര്യം സ്ഥിരീകരിച്ചതോടെ നദിയിൽ ഹിമാൻഷുവിനായി തിരച്ചിൽ ആരംഭിക്കുകയായിരുന്നു. വിവിധ സംഘങ്ങളായി തിരിഞ്ഞാണ് പ്രദേശത്ത് പോലീസ് തിരച്ചിൽ നടത്തുന്നത്.
