കൊച്ചി; മോഹൻലാലിനെ പോലെ തന്നെ മലയാളികൾക്ക് ഏറെ പ്രിയപ്പെട്ടയാളാണ് അദ്ദേഹത്തിന്റെ മകനും യുവനടനുമായ പ്രണവ് മോഹൻലാൽ. 2002 ൽ ഒന്നാമൻ എന്ന ചിത്രത്തിൽ ബാലതാരമായി എത്തിയ പ്രണവ് മോഹൻലാൽ ഇന്ന് മലയാളത്തിലെ താരമൂല്യമുള്ള യുവനടനാണ്. വിരലിലെണ്ണാവുന്ന ചിത്രങ്ങളിൽ മാത്രമേ അഭിനയിച്ചിട്ടുള്ളൂ എങ്കിലും താരത്തെ സ്വന്തം വീട്ടിലെ കുട്ടിയായി മലയാളികൾ കാണുന്നു. വലിയ താരത്തിന്റെ മകനാണെന്ന താരജാഡകളൊന്നും തന്നെ ഇല്ലാതെ വളരെ ലളിത ജീവിതം നയിക്കുന്ന പ്രണവിന്റെ ജീവിതരീതികളും ആളുകൾക്കിഷ്ടമാണ്. ആരെയും അറിയിക്കാതെ, ആഘോഷക്കൊഴുപ്പുകളുടെ അകമ്പടിയില്ലാതെ യാത്ര ചെയ്യാനും സാഹസികമായ കാര്യങ്ങളിലേർപ്പെടാനുമാണ് പ്രണവിന് ഇഷ്ടം.
ഇപ്പോഴിതാ പ്രണവിന്റെ ജീവിതത്തിൽ നടന്ന ഒരു കാര്യത്തെ കുറിച്ച് സംസാരിക്കുകയാണ് ആലപ്പി അഷറഫ്. അച്ഛൻ മോഹൻലാലിനെ കാണാനെത്തിയ പ്രണവിനെ സെക്യൂരിറ്റിക്കാർ ആളറിയാതെ പിടിച്ചുവച്ച സംഭവമാണ് ആലപ്പി അഷറഫ് പറയുന്നത്. ബറോസിന്റെ ഷൂട്ടിനിടെയാണ് ഈ സംഭവം. ”സ്‌പെയിനിൽ ബറോസിന്റെ ചിത്രീകരണം നടക്കുന്ന സ്ഥലത്ത് അച്ഛൻ മോഹൻലാലിനെ കാണാൻ പ്രണവ് ഊബറിൽ വന്നിറങ്ങുന്നു. പതിവുപോലെ വളരെ ലളിതമായ വേഷത്തിലായിരുന്നു പ്രണവ്. ഇതുകണ്ട സെക്യൂരിറ്റിക്കാരൻ പ്രണവിനെ തടഞ്ഞു. ഷൂട്ടിങ് സ്ഥലത്തേക്ക് ആരെയും കടത്തിവിടരുതെന്ന് മോഹൻലാലിന്റെ കർശന നിർദേശമുണ്ടായിരുന്നുവെന്ന് ആലപ്പി അഷ്‌റഫ് പറയുന്നു.
ആരെ കാണാൻ വന്നതാണെന്ന സെക്യൂരിറ്റിയുടെ ചോദ്യത്തിന് അച്ഛനെ കാണാനാണ് വന്നതെന്നായിരുന്നു പ്രണവിന്റെ മറുപടി. എന്നാൽ യാതൊരു കാരണവശാലും അകത്തുകയറാൻ സാധിക്കില്ലെന്ന് സെക്യൂരിറ്റി അദ്ദേഹത്തെ അറിയിച്ചു. തിരിച്ചൊന്നും പറയാതെ പ്രണവ് അവിടെ തന്നെ ചിരിച്ചുകൊണ്ട് നിലയുറപ്പിച്ചു. ആരെയും കാണാൻ സാധിക്കില്ല, തിരിച്ചുപൊയ്ക്കോളൂ എന്ന് സെക്യൂരിറ്റി പറഞ്ഞിട്ടും പ്രണവ് അവിടെത്തന്നെ നിൽക്കുകയായിരുന്നു. കുറേ അധികസമയം ഇങ്ങനെ നിന്നുകഴിഞ്ഞപ്പോൾ സംശയം തോന്നിയ സെക്യൂരിറ്റി, ഗേറ്റിന് പുറത്ത് അച്ഛനെ കാണണമെന്ന് പറഞ്ഞ് ഒരു പയ്യൻ വന്ന് നിൽപ്പുണ്ടെന്ന് ഷൂട്ടിങ് സംഘത്തെ അറിയിച്ചു. ഇവിടുത്തെ ആരുടെയെങ്കിലും മകനാണോ എന്ന് ഒന്ന് വന്നുനോക്കാനും പറഞ്ഞു. ഇതുകേട്ട് അന്ന് ഷൂട്ടിങ് സംഘത്തിലുണ്ടായിരുന്ന ഫോട്ടോഗ്രാഫറും സംവിധായകനുമായ അനീഷ് ഉപാസന വന്ന് നോക്കുമ്പോഴാണ് അത് പ്രണവാണെന്ന് മനസിലായത്. പ്രണവ് ആരാണെന്ന് പറഞ്ഞപ്പോൾ സെക്യൂരിറ്റി ജീവനക്കാരൻ പോലും ഞെട്ടിപ്പോയെന്ന് സംവിധായകൻ പറയുന്നു.
