ടെഹ്റാൻ : ഇസ്രായേലിലേക്ക് ഖോറാംഷഹർ-4 മിസൈൽ വിക്ഷേപിച്ച് ഇറാൻ. ഇന്ന് പുലർച്ചെ ഇസ്രായേൽ പ്രദേശത്തേക്ക് ഖോറാംഷഹർ -4 ഹെവി മിസൈൽ വിക്ഷേപിച്ചതായി ഇറാനിയൻ സ്റ്റേറ്റ് മീഡിയ റിപ്പോർട്ട് ചെയ്തു. റിപ്പോർട്ട് അനുസരിച്ച്, ഈ മിസൈലിന് ഒരു ടൺ വാർഹെഡ് വഹിക്കാൻ കഴിയും. ഏകദേശം 2,000 കിലോമീറ്റർ ദൂരപരിധിയുണ്ടെന്നും കണക്കാക്കപ്പെടുന്നു.
ഇസ്രായേൽ വ്യോമസേനയുടെ 27-ാമത് സ്ക്വാഡ്രൺ ബേസിലേക്ക് ഈ മിസൈൽ വിക്ഷേപിച്ചു എന്നാണ് ഇറാന്റെ ഇസ്ലാമിക് റെവല്യൂഷണറി ഗാർഡ് കോർപ്സ് അവകാശപ്പെട്ടത്. എന്നാൽ ഇസ്രയേലിലേക്ക് വിക്ഷേപിച്ച ഇറാന്റെ എല്ലാ ബാലിസ്റ്റിക് മിസൈലുകളെയും വ്യോമ പ്രതിരോധ സേന തകർത്തതായി ഐഡിഎഫ് അറിയിച്ചു. കൂടാതെ ഇറാൻ അവകാശ വാദത്തിൽ പരാമർശിക്കുന്നത് പോലെ ഇസ്രായേലി വ്യോമസേനയിൽ 27-ാമത് സ്ക്വാഡ്രൺ ഇല്ല എന്നും ഇസ്രായേൽ പ്രതിരോധ സേന വ്യക്തമാക്കി. ബെൻ ഗുരിയോൺ വിമാനത്താവളത്തിന്റെ ഭാഗമായ എയർബേസ് 27 ആയിരിക്കാം ഇറാൻ ഉദ്ദേശിച്ചത് എന്നും എന്നാൽ അത് 2010 ൽ എന്നെന്നേക്കുമായി അടച്ചുപൂട്ടിയതാണെന്നും ഇസ്രായേൽ അറിയിച്ചു.
