കൊല്ലം: പ്രാർത്ഥനയിലൂടെ രോഗശാന്തി വാഗ്ദാനം ചെയ്ത് പതിനാറുകാരിയെ പീഡിപ്പിച്ച കേസിൽ പ്രമുഖ സോഷ്യൽ മീഡിയ വ്ലോഗറും മതപണ്ഡിതനുമായ കരുനാഗപ്പള്ളി സ്വദേശി അറസ്റ്റിൽ. ഹബീബിയ്യ ഇസ്ലാമിക്‌ അക്കാദമി എന്ന സ്ഥാപനത്തിന്റെ ഡയറക്ടറായ മുഹമ്മദ്‌ നിയാസ് ജൗഹറിയെയാണ് കരുനാഗപ്പള്ളി പോലീസ് പിടികൂടിയത്. പ്രായപൂർത്തിയാകാത്ത പെൺകുട്ടിയെ ലൈംഗികമായി ചൂഷണം ചെയ്ത സംഭവത്തിൽ ഇയാൾക്കെതിരെ പോക്സോ (POCSO) വകുപ്പുകൾ ചുമത്തിയാണ് കേസ് രജിസ്റ്റർ ചെയ്തിരിക്കുന്നത്.
പിതാവിന്റെ അമ്മയ്ക്കൊപ്പം പ്രാർത്ഥനയ്ക്കായി അക്കാദമിയിലെത്തിയ പെൺകുട്ടിയെ ഇയാൾ നിരന്തരം ചൂഷണം ചെയ്യുകയായിരുന്നു എന്നാണ് പോലീസ് റിപ്പോർട്ട്. 2025 മുതൽ 2026 വരെയുള്ള കാലയളവിൽ കുട്ടിയുടെ കുടുംബത്തിന്റെ വിശ്വാസം മുതലെടുത്ത് പല കാരണങ്ങൾ പറഞ്ഞ് പെൺകുട്ടിയെ വിവിധ സ്ഥലങ്ങളിൽ എത്തിക്കുകയും ക്രൂരമായ ലൈംഗികാതിക്രമത്തിന് ഇരയാക്കുകയുമായിരുന്നു. മാനസികമായും ശാരീരികമായും തകർന്ന പെൺകുട്ടി വിവരങ്ങൾ പുറത്തുപറഞ്ഞതോടെയാണ് ക്രൂരതയുടെ കഥ പുറത്തറിയുന്നത്.
തുടർന്ന് ബന്ധുക്കൾ നൽകിയ പരാതിയുടെ അടിസ്ഥാനത്തിൽ കരുനാഗപ്പള്ളി പോലീസ് കേസ് രജിസ്റ്റർ ചെയ്യുകയും പ്രതിയെ കസ്റ്റഡിയിലെടുക്കുകയുമായിരുന്നു. പ്രദേശത്ത് അറിയപ്പെടുന്ന വ്ലോഗർ കൂടിയായ പ്രതിയുടെ അറസ്റ്റ് വാർത്ത വലിയ ഞെട്ടലാണ് നാട്ടുകാരിലും സോഷ്യൽ മീഡിയയിലും ഉണ്ടാക്കിയിരിക്കുന്നത്. സംഭവത്തിൽ കൂടുതൽ പെൺകുട്ടികൾ ഇയാളുടെ പീഡനത്തിന് ഇരയായിട്ടുണ്ടോ എന്നതടക്കമുള്ള വിവരങ്ങൾ പോലീസ് വിശദമായി അന്വേഷിച്ചു വരികയാണ്. പിടിയിലായ പ്രതിയെ കോടതിയിൽ ഹാജരാക്കി റിമാൻഡ് ചെയ്തു.
