ന്യൂഡൽഹി : ഡൽഹി കലാപവുമായി ബന്ധപ്പെട്ട് അറസ്റ്റിലായ മുൻ ജെഎൻയു വിദ്യാർത്ഥി ഉമർ ഖാലിദിന് പിന്തുണയുമായി മുതിർന്ന കോൺഗ്രസ് നേതാക്കൾ. കോൺഗ്രസ് നേതാക്കളായ ശശി തരൂരും ദിഗ്‌വിജയ സിംഗുമാണ് രാജ്യവിരുദ്ധ പ്രവർത്തനങ്ങൾക്ക് ചുക്കാൻ പിടിച്ച ഉമർ ഖാലിദിനു പിന്തുണയുമായി രംഗത്ത് വന്നിട്ടുള്ളത്. ഉമർ ഖാലിദിന്റെ പിതാവ് സയിദ് ഖ്വാസിം റസൂൽ ഇല്യാസിന്റെ ട്വീറ്റ് പങ്കുവെയ്ക്കുകയും ഒപ്പം സ്റ്റാൻഡ് വിത്ത്‌ ഉമർ ഖാലിദ് എന്ന ഹാഷ്ടാഗും കൂട്ടിച്ചേർത്താണ് ട്വിറ്ററിലൂടെ ശശി തരൂരും ദിഗ്‌വിജയ സിംഗും തങ്ങളുടെ പിന്തുണയറിയിച്ചത്.
ജെഎൻയുവിൽ അഫ്സൽ ഗുരു അനുസ്മരണം ആസൂത്രണം ചെയ്തതുൾപ്പെടെ ഇടത് വിദ്യാർത്ഥി നേതാവായ ഉമർ ഖാലിദ് മുമ്പും രാജ്യ വിരുദ്ധ പ്രവർത്തനങ്ങളിൽ ഏർപ്പെട്ടിരുന്നതായി അന്വേഷണത്തിൽ കണ്ടെത്തിയിട്ടുണ്ട്. എന്നാൽ, ഇതെല്ലാം മറച്ചു വെച്ചാണ് കോൺഗ്രസ് നേതാക്കൾ ഉമർ ഖാലിദിന് ഐക്യദാർഢ്യം പ്രഖ്യാപിച്ച് രംഗത്തു വന്നിട്ടുള്ളത്. പൗരത്വ ഭേദഗതി നിയമത്തിനെതിരെ ഡൽഹിയിൽ കലാപം ആസൂത്രണം ചെയ്തതിൽ പങ്കുണ്ടെന്ന് കണ്ടെത്തിയതിനെ തുടർന്ന് ഞായറാഴ്ചയാണ്‌ ഉമർ ഖാലിദിനെ പോലീസ് അറസ്റ്റ് ചെയ്തത്. ഉമറിനെ കർകർദൂമ കോടതി 10 ദിവസത്തേക്ക് പോലീസ് കസ്റ്റഡിയിൽ വിട്ടിരുന്നു.
