ഡൽഹി: കർഷക സംഘടനകൾ എന്നവകാശപ്പെടുന്നവർ ആഹ്വാനം ചെയ്ത ഭാരത് ബന്ദ് പരാജയമെന്ന് ബിജെപി നേതാവ് കപിൽ മിശ്ര. ബന്ദ് പരാജയപ്പെട്ടതിന്റെ വിഷമത്തിൽ വീടിനുള്ളിൽ നിന്ന് പുറത്തിറങ്ങാൻ കൂട്ടാക്കാത്ത ഡൽഹി മുഖ്യമന്ത്രി അരവിന്ദ് കെജരിവാൾ നുണ പ്രചാരണം നടത്തുകയാണെന്നും അദ്ദേഹം ആരോപിച്ചു.
അരവിന്ദ് കെജരിവാൾ വീട്ടു തടങ്കലിലാണെന്ന ആം ആദ്മി പാർട്ടിയുടെ പ്രചാരണത്തോട് പ്രതികരിക്കുകയായിരുന്നു കപിൽ മിശ്ര. രാജ്യം നിശ്ചലമാകുമെന്ന് സമരക്കാർ പ്രചരിപ്പിക്കുന്ന ബന്ദിന്റെ അന്ന് ഡൽഹിയിലെ എല്ലാ വാണിജ്യ കേന്ദ്രങ്ങളും തുറന്ന് പ്രവർത്തിക്കുന്നതായും റോഡുകളിൽ ഗതാഗതം സുഗമമാണെന്നും അദ്ദേഹം അവകാശപ്പെട്ടു.
കെജരിവാൾ വീട്ടു തടങ്കലിലാണെന്ന ആരോപണം ഡൽഹി പൊലീസും നിഷേധിച്ചു. മുഖ്യമന്ത്രിയുടെ ആരോപണം അടിസ്ഥാന രഹിതവും ശുദ്ധ അസംബന്ധവുമാണെന്ന് നോർത്ത് ഡൽഹി ഡിസിപി ആന്റോ അൽഫോൺസ് വ്യക്തമാക്കി. കെജരിവാളിന്റെ ആരോപണം തെറ്റാണെന്ന് തെളിയിക്കുന്ന ദൃശ്യങ്ങളും അദ്ദേഹം പുറത്ത് വിട്ടു.
