ന്യൂഡൽഹി: ഭാരത് ജോഡോ യാത്രയ്ക്കിടെ രാഹുൽ ഗാന്ധിയുടെ സുരക്ഷ ഉറപ്പാക്കണമെന്ന് ആവശ്യപ്പെട്ട് അമിത് ഷായ്ക്ക് കത്തെഴുതി കോൺഗ്രസ് ജനറൽ സെക്രട്ടറി കെ.സി വേണുഗോപാൽ. ഡിസംബർ 24 ന് രാഹുലിന്റെ യാത്ര ഡൽഹിയിൽ പ്രവേശിച്ചപ്പോൾ നിരവധി തവണ സുരക്ഷയിൽ വീഴ്ച ഉണ്ടായതായും ഇസഡ് പ്ലസ് സുരക്ഷ ഉറപ്പുവരുത്തണമെന്നും കത്തിൽ ആവശ്യപ്പെടുന്നു.
രാഹുലിന് സമീപമെത്തിയ ജനക്കൂട്ടത്തെ നിയന്ത്രിക്കുന്നതിൽ ഡൽഹി പോലീസ് പൂർണമായി പരാജയപ്പെട്ടുവെന്നും കത്തിൽ ആരോപിക്കുന്നു. പാർട്ടിയുടെ രണ്ട് പ്രധാനമന്ത്രിമാർ രാജ്യത്തിന്റെ ഐക്യത്തിനും അഖണ്ഡതയ്ക്കും വേണ്ടി ജീവൻ ത്യജിച്ചുകഴിഞ്ഞുവെന്നും കത്തിൽ പറയുന്നു.
ഇസഡ് പ്ലസ് കാറ്റഗറിയിൽ ഉളള ഒരു വ്യക്തിയുടെ എല്ലാ സുരക്ഷയും രാഹുലിന് ഉറപ്പുവരുത്താൻ അടിയന്തര നടപടി കൈക്കൊളളണമെന്നും കെസി വേണുഗോപാൽ ആവശ്യപ്പെടുന്നു. കഴിഞ്ഞ ആഴ്ചയാണ് ഭാരത് ജോഡോ യാത്ര ഡൽഹിയിൽ പ്രവേശിച്ചത്.
