ദിനവും ഒരു ആപ്പിൾ കഴിക്കുന്നത് ഡോക്റ്ററെ അകറ്റിനിർത്തുമെങ്കിൽ ദിവസവും ഒരു ഓറഞ്ച് കഴിക്കുന്നത് രോഗപ്രതിരോധശേഷി ഇരട്ടിയാക്കും.വിറ്റാമിൻ സി കൊണ്ട് സമ്പന്നമായതിനാൽ തന്നെ ഇത് നിരവധി ആരോഗ്യ സൗന്ദര്യ ഗുണങ്ങൾ ഉണ്ട്. നാരുകൾ ധാരാളമായി അടങ്ങിയിരിക്കുന്നതിനാൽ, കൊളസ്‌ട്രോൾ നിയന്ത്രിക്കാനും ഹൃദയാരോഗ്യം മെച്ചപ്പെടുത്താനുമെല്ലാം ഓറഞ്ച് സഹായിക്കും. എന്നാൽ ഓറഞ്ച് കഴിക്കാനായി തെരഞ്ഞെടുക്കുമ്പോൾ പലർക്കുമുള്ള സംശയമാണ് ഓറഞ്ച് കഴിക്കണോ ജ്യൂസ് കുടിക്കണോ എന്നത്.
തീർച്ചയായും ജ്യൂസിനേക്കാൾ നല്ലത് ഓറഞ്ച് നേരിട്ട് കഴിക്കുന്നത് തന്നെയാണ്. ജ്യൂസ് കുടിക്കുന്നത് പഴങ്ങൾ കഴിക്കുന്നതിനേക്കാൾ ആരോഗ്യകരമല്ല. ജ്യൂസ് പതിവായി കഴിക്കുന്നത് രക്തത്തിലെ പഞ്ചസാരയുടെ അളവിന്റെ വേഗത്തിലുള്ള വർദ്ധനവിന് കാരണമാകുകയും ടൈപ്പ് 2 പ്രമേഹം വരാനുള്ള സാധ്യത വർദ്ധിപ്പിക്കുകയും ചെയ്യുന്നു.
എന്നാൽ ഓറഞ്ച് പഴമായി കഴിച്ചാൽ ഇത്തരമൊരു അവസ്ഥ ഉണ്ടാകില്ല. പാക്കറ്റ് ജ്യൂസുകൾ മൾട്ടി-സ്റ്റെപ്പ് പ്രോസസ്സിംഗിനും വിധേയമാകുന്നു എന്നതിനാൽ പൂർണമായും ഒഴിവാക്കണം. ഫ്രക്ടോസ് അടങ്ങിയ ഓറഞ്ച് ജ്യൂസ് കഴിക്കുകയാണെങ്കിൽ ഹൃദയ സംബന്ധമായ അസുഖങ്ങൾ, പ്രമേഹം, കരൾ രോഗങ്ങൾ എന്നിവ ഉണ്ടാകാനുള്ള സാധ്യത ഏറെയാണ്.
ഒരു ഗ്ലാസ് ഓറഞ്ച് ജ്യൂസിൽ ഓറഞ്ച് പഴത്തിനെക്കാൾ കൂടുതൽ കലോറിയും കാർബോഹൈഡ്രേറ്റും അടങ്ങിയിട്ടുണ്ട്. ഒരു കപ്പ് ഓറഞ്ച് ജ്യൂസിൽ ഒരു ഓറഞ്ചിന്റെ ഇരട്ടി കലോറിയാണ് അടങ്ങിട്ടിട്ടുള്ളത്.
