പട്‌ന : പട്ടാപ്പകൽ നവവധുവിനെ കുടുംബക്കാർ തട്ടിക്കൊണ്ട് പോയി. ബീഹാറിലാണ് സംഭവം. ബൈക്കിലെത്തിയ രണ്ട് പേർ ഭർത്താവിന്റെ വീട്ടിൽ അതിക്രമിച്ച് കയറി ഇവരെ എടുത്തുകൊണ്ട് പോകുകയായിരുന്നു.
അരാരിയയിലാണ് സംഭവം നടന്നത്. ഏറെ കാലമായി പ്രണയത്തിലായിരുന്ന യുവാവുമൊത്തുള്ള ഇവരുടെ വിവാഹം കഴിഞ്ഞ ദിവസമാണ് നടന്നത്. മറ്റൊരു ജാതിയിൽ പെട്ടയാളായതിനാൽ യുവതിയുടെ വീട്ടുകാർ ഈ വിവാഹത്തെ എതിർത്തിരുന്നു. വീട്ടുകാരുടെ അനുമതിയില്ലാതെയാണ് യുവതി കാമുകനെ വിവാഹം കഴിച്ചത്.
തുടർന്ന് യുവതിയെ സ്വന്തം കുടുംബാംഗങ്ങൾ ഭർത്താവിന്റെ വീട്ടിലെത്തി തട്ടിക്കൊണ്ട് പോകുകയായിരുന്നു. പെൺകുട്ടിയെ തട്ടിക്കൊണ്ട് പോകുന്ന ദൃശ്യങ്ങൾ സമൂഹമാദ്ധ്യമങ്ങളിൽ പ്രചരിക്കുന്നുണ്ട്. ബൈക്കിലെത്തിയ രണ്ട് പേർ അവളെ എടുത്തുകൊണ്ട് പോകുകയാണ് ചെയ്തത്. തന്നെ രക്ഷിക്കാൻ ആവശ്യപ്പെട്ടുകൊണ്ട് യുവതി അലറിക്കരയുന്നതും കാണാം.
മരുമകളെ അവളുടെ വീട്ടുകാർ കൊന്ന് കളയുമെന്ന് ഭയമുണ്ടെന്ന് യുവാവിന്റെ അച്ഛൻ പറഞ്ഞു. സംഭവത്തിൽ പോലീസിൽ പരാതി നൽകിയിട്ടുണ്ട്.
