ന്യൂഡൽഹി : എസ്എഫ്‌ഐ സംസ്ഥാന സെക്രട്ടറി പിഎം ആർഷോയുടെ പരാതിയിൽ ഏഷ്യാനെറ്റ് ന്യൂസ് മാദ്ധ്യമപ്രവർത്തകയ്‌ക്കെതിരെ കേസെടുത്ത സംഭവത്തിൽ പ്രതികരിക്കാതെ സിപിഎം ജനറൽ സെക്രട്ടറി സീതാറാം യെച്ചൂരി. അങ്ങനെയൊരു കേസിനെക്കുറിച്ച് അറിയില്ലെന്നാണ് മാദ്ധ്യമപ്രവർത്തകരുടെ ചോദ്യത്തിന് മറുപടിയായി യെച്ചൂരി പറഞ്ഞത്.
ഡൽഹിയിൽ വെച്ച് മാദ്ധ്യമസ്വാതന്ത്രത്യത്തെക്കുറിച്ചാണ് മാദ്ധ്യമപ്രവർത്തകൻ യെച്ചൂരിയോട് ചോദിച്ചത്. ആർഷോ നൽകിയ പരാതിയിൽ പിണറായി വിജയന്റെ നേതൃത്വത്തിലുള്ള കേരള പോലീസ് ഏഷ്യാനെറ്റ് ന്യൂസ് റിപ്പോർട്ടറായ അഖില നന്ദകുമാറിനെതിരെ കേസെടുത്ത നടപടിയെക്കുറിച്ചായിരുന്നു ചോദ്യം. എന്നാൽ കേരളത്തിലെ കാര്യങ്ങൾ തനിക്കറിയില്ലെന്ന് പറഞ്ഞ് യെച്ചൂരി പിന്മാറുകയായിരുന്നു.
വേണ്ടിവന്നാൽ ഇനിയും കേസെടുക്കുമെന്ന് സിപിഎം സംസ്ഥാന സെക്രട്ടറി എംവി ഗോവിന്ദൻ തറപ്പിച്ച് പറയുന്നതിനിടെയാണ് യെച്ചൂരി പ്രതികരിക്കാതെ പിന്മാറുന്നത്. മോദി ഭരണത്തിന് കീഴിൽ മാദ്ധ്യമങ്ങൾ ആക്രമിക്കപ്പെടുന്നുവെന്ന വിമർശനം ഉയർത്തുന്ന സിപിഎം, സ്വന്തം സർക്കാരിന്റെ നടപടിയെക്കുറിച്ച് മിണ്ടുന്നില്ലെന്ന വിമർശനങ്ങളും ഉയരുന്നുണ്ട്.
